1 сентябрьдә Татарстан башкаласы югары уку йортларына 1 курска 20 мең егет һәм кыз укырга керде. Студент тормышына яңа аяк баскан яшьләр Белем бәйрәмен “Казан” гаилә үзәге янында каршы алды.
Мәгълүм булганча, студентлар шәһәре – Казанда 160 меңгә якын студент һәм аспирант яшьләр белем ала. Башкалада беренче курслар өчен 1 сентябрьдә зур бәйрәм оештыру күркәм гадәткә әверелде. Быел бу көнне иртәдән яңгыр явуга карамастан, зонтиклар тоткан егетләр һәм кызлар “Казан” гаилә үзәге янындагы мәйданга җыелды. Биредә корып куелган сәхнәдә концерт барды, Казан студентлары алдында чыгыш ясарга Мәскәүдән рэпер T-Killah чакырылган иде. Бу көнне 1 курс студентларын, шулай ук аларның әти-әниләрен, мөгаллимнәрне Белем көне белән Татарстан Президенты Рөстәм Миңнеханов тәбрик итте.
– Без Татарстан, башкалабыз Казан, дәрәҗәле университетларыбыз белән горурланабыз. Биредә сез югары белем алып, көндәшлеккә сәләтле белгечлекләр үзләштерерсез, дип ышанам. Соңгы елларда республикада социаль вәзгыятьне яхшырту, икътисадны үстерү өчен күп эшләнде. Татарстанның 2030 елга кадәр үсеш стратегиясе үзәгендә – кеше капиталы билгеләнде, безнең аңа ихтыяҗыбыз бик зур, без сезгә зур өметләр баглыйбыз, – дип мөрәҗәгать итте студентларга Рөстәм Миңнеханов.
Студентларны башкаланың уннан артык әйдәп баручы югары уку йортлары җитәкчеләре – Казан федераль университеты, шулай ук илкүләм фәнни-тикшеренү техника һәм технология университетлары, төзелеш һәм архитектура университеты, аграр университет, ветеринария академиясе, энергетика университеты, физик культура академиясе, медицина университеты, мәдәният һәм сәнгать институты, кооператив институт (һ.б.) ректорлары сәламләде. Татарстанның Югары уку йортлары ректорлары советы исеменнән әлеге советның рәисе, КФУ ректоры Илшат Гафуров чыгыш ясады. “Икенче ел рәттән без Казанның 1 курс студентларын Белем көнендә бергә җыябыз, чөнки без башкалада бер гаилә булып яшибез. Казанда Россиянең төрле төбәкләреннән яшьләр укый, чит илләрдән дә 8 мең кеше белем ала. Сезгә Казан уку йортларын сайлавыгыз өчен рәхмәтебезне белдерәбез. Кабатланмас студент елларын күңелле итеп үткәрегез, тормышыгыз фәнни, иҗади һәм спорт казанышларына бай булсын”, – дип теләде Илшат Гафуров.
Бәйрәм тантанасы барышында биек экран аша Казан яшьләренә Түбән Кама, Алабуга, Чаллы студентлары видео сәламнәрен җиткерде. Сәхнә янында 2018 елда футбол буенча дөнья Чемпионатында волонтер булып эшләргә теләгән яшьләрдән гаризалар кабул итү пункты да эшләде.
КФУның Филология һәм мәдәни багланышлар институтына укырга кергән Уфа кызы Анастасия Яруллина сүзләренчә, университетта 1 курс студентларына бигрәк тә кадерле «Студент билеты»н августның соңгы көннәрендә тапшырганнар. “Өскә яңгыр явып торса да, көн салкынча булса да, безгә бу бәйрәмдә барыбер күңелле, бүген безнең хыялыбыз тормышка ашкан көн. Без, ниһаять, Казан студентлары булдык. Уфада техник белгечлекләргә яхшы укыталар, ә Казанда филология белеме көчле, шуңа күрә Татарстанга килдем. Казан бик матур, гөрләп тора, тулай тораклар да яңа, чиста, студентлар өчен бу да мөһим”, – дип ассызыклый студент кыз.
Кама Тамагы районының Теньки авылыннан классташлар Алия Гарипова белән Галина Ибраһимова Белем көнен янә бергә, бер зонтик астында каршы алды. Бу юлы – Казанда, аларны 1 курс студентлары бәйрәме очраштырды. Алия – технология университетының җиңел сәнәгать һәм мода технологиясе факультеты, ә Галина ветеринария академиясе студенты. “Казанда яңа дуслар табарбыз, тик балачак дусларыбыз белән дә араларыбыз өзелмәсен иде. Бүген истәлекле, дулкынландыргыч көн, иртәгәдән укулар башлана, аннан соң алда – беренче сессия. Мәктәп, әти-әниләр сагындырыр төсле...”, – дип елмая кызлар.
сылтама:
http://intertat.ru/
Комментарий юк