Яз-җәй көннәрендә, кыска җиңле күлмәкләрдән йөргәндә, беләзек, йөзек ише, игътибарны җәлеп итәрдәй бизәнү әйберләре дә таксаң, кул тиресе «тел-теш тидермәслек» булырга тиеш. Кулларны тәрбияләү өчен берничә рецепт тәкъдим итәбез.
Тозлы кәбестә, әчегән сөт, эремчек суы кул тиресен яхшы йомшарта. Кулыгызны биш-ун минутка шуларның берсенә тыгып торыгыз да, җылы су һәм сабын белән юып, майлы крем тидерегез.
Кул тиресен тәртипкә китерү өчен бәрәңге пешкән су да – менә дигән.
Кул тиресен агартыйм дисәгез, әллә нәрсәләр эзләп ерак барасы юк. Түтәлдә генә үскән кузгалак суты да тирене бик яхшы агарта.
Яргаланган кул тиресен йомшарту өчен менә бу рецептны кулланып карарга була: 25 г миндаль мае, 1 йомырка сарысы, 1 лимон сутын бик яхшылап туглыйбыз. Кич белән, эшләр беткәч, шушы массаны кулга сылап, өстеннән чүпрәк перчатка киябез. 3-4 сәгатьтән соң юып төшереп, кулга тукландыргыч крем сылыйбыз.
Тукландыргыч кремны да өйдә ясарга мөмкин: 1 аш кашыгы теләсә нинди кипкән дару үләненә (ромашка, пәйгамбәр тырнагы, бака яфрагы) 1 стакан кайнап торган су агызып, бер сәгать төнәтәбез. Су «мунчасы»нда эретелгән 1 аш кашыгы балга 2 аш кашыгы үлән төнәтмәсе кушабыз. 50 г каз маена (башка төрле майлар да ярый) 1,5-2 аш кашыгы кастор мае һәм үлән төнәтмәсе салынган балны кушып, бик яхшылап туглыйбыз. Кремны суыткычта сакларга кирәк.
Менә бу рецептны да кулланып карарга була: ланолин кремын бер савытка сытып чыгарып, аш кашыгы алоэ суты һәм 2 аш кашыгы зәйтүн мае өстибез. Барысын бергә яхшылап туглагач, крем әзер.
Комментарий юк