​Кулдан тукылган палас

Киелмичә яткан кием-салымнан котылу юлын өйрәтикме? Киңәшебезгә колак салсагыз, ике куянны бергә тотарсыз: шкафларыгыз да бушап калыр, ишек төбенә яки ванна бүлмәсенә җәю өчен паласлы да булырсыз. Идәнгә җәяргә кызгансагыз, урындыкларга ябарсыз. Бу паласны туку өчен ике сәгать вакыт җитә.
 

Кирәк: 

* унлап футболка яки юка трикотаж блузкалар;
* диаметры 70-80 см коршау (обруч).
 

Эш барышы:

Бер футболкадан киңлеге 3 см булган 11 тасма теләбез. Бөгелгән аскы өлешен һәм җиң турыларын кулланмыйбыз.

Тасмаларны рәсемдәгечә итеп коршауга кидерәбез. Алар элмәк була.

Калган футболкаларны да 3 см тасмаларга теләбез, тасмалар тигез булса, паласыбыз җыйнаграк булачак. Болары аркылы җепләр булыр.

Коршауга кидерелгән элмәкләр так санда булсын өчен, ике элмәкне берләштереп, 21 элмәккә калдырабыз.

Шушы берләштерелгән элмәккә беренче аркылы җепне бәйләп, паласны тукырга керешәбез. 

Туку принцибы кәрзин үргәндәгедәй. Аркылы җеп – бер элмәкнең астыннан, икенчесенең өстеннән уза. 

Икенче рәткә чыккач исә, киресенчә, аркылы җеп беренче рәттә элмәкнең аскы ягыннан узган булса, хәзер инде өске ягыннан узарга тиеш. Җепләрне тарттырмагыз, бушрак кына булсын, югыйсә палас куырылып киләчәк. Фәкать рәт аралары тыгыз булу кирәк.

Паласның тукылган өлеше 20 см чамасы булгач, әлегәчә ике җептән торган элмәкләрне аерабыз – бер генә җеплегә калдырабыз. Иң соңгы рәтне чыкканда аркылы җеп элмәкнең аскы һәм өске ягыннан түгел, уртасыннан гына уздырыла.

Паласны тукып бетергәч, элмәк­ләрне берәм-берәм кисеп, ике очын бәйләп куябыз.