Мин үземне белә башлаганнан бирле, «Фәридә-Алсу» дуэтының җырларын көйләп йөргәнемне хәтерлим. Хәзер инде үзем дүртенче дистәгә якынлашып киләм, ләкин Фәридә апа белән Алсу апа бер дә үзгәрми. Алар көннән-көн чибәрләнә генә бара. Репертуарлары тагын да эчтәлекле һәм күңелгә үтеп керерлек җырлары белән сокландыра. «Фәридә-Алсу» дуэтына 30 ел тулган көннәрдә, алар Татарстанның халык артистлары дигән мәртәбәле исемгә дә лаек булды. Ниһаять! Әле шушы көннәрдә генә Фәридә апа Әхмәтшина үзенең 50 яшьлек юбилеен да билгеләп үтте. Берсеннән-берсе бәхетле вакыйгалар...
