Аякларын чак сөйри-сөйри урам буйлап атлаган Миңлегәрәйнең үз капкасына борылганын тәрәзәдән күреп,Тәнзилә, гаҗәпсенеп, көтелмәгән кунакны каршыларга чыкты. Ишегалдында хәл-әхвал сорашып бер тын басып торгач, Тәнзилә картны өенә узарга чакырды. Миңлегәрәй картның йомышы капка төбендә хәл итәрлек түгел иде, ахры, кыстаганны көтмичә, Тәнзиләнең бәләкәй генә куышы эченә узды. Мондый олпат затның Тәнзилә бусагасын тәүге кат атлавы иде...
