Үзебезнекен сатып ал! яки «Милли сәүдә маркасы»на лаек ризыклар нинди була.

Нәкъ менә бүген, нәкъ менә хәзерге минутларда «Казан агросәнәгать паркы»нда «Милли сәүдә маркасы» фестивале башланып китте. Ул «Татарстанныкын сатып ал!» дип аталган форум кысаларында уза. Фестивальдә үзебездә үскән бер дигән азык төлек, үзебездә үк җитештерелгән сыйфатлы товарлары белән катнашучы оешмалар берничә номинациягә бүленеп сыналачак. «Каймак» номинациясендә – сөт ризыклары җитештерүчеләр, «Казалык» дигәнендә – ит ризыклары әзерләүчеләр, «Чәк-чәк» номинациясендә исә камыр ризыклары, тәм-том пешерүчеләр бәяләнәчәк. Болардан тыш әле тагын «Ел ачышы» дигән номинация буенча да җиңүче билгеләнәчәк. Фестивальнең максаты изге – «Милли сәүдә маркасы» астына үзебездә үскән сыйфатлы азык-төлектән үз территориябездә халыкка яхшы продукция җитештерүчеләрне берләштерү. Конкурста катнашучылар җитештергән ризыклар республикабызның эчке һәм тышкы базарында ташламалы шартларда сатуга чыгарылачак. Ә җиңүчеләр «Милли сәүдә маркасы» бренды астында эшләргә лаек булачак. Сыйфатлы ризык нинди була икән ул дип кызыксынсагыз, «Казан агросәнәгать паркы»на рәхим итегез. Иртәнге сәгать уннан кичке җидегә кадәр анда күңелегезгә ошаган ризыклардан авыз итеп карарга мөмкин. Фестиваль иртәгә дә дәвам итә. Сәүдә заллары иртәнге сигездән эшли башлый. Сәгать уннан мавыктыргыч мастер-класслар күрсәтергә ният итеп торалар. Килегез, кызыклы да, файдалы да булачак!