Казанда ТР Дәүләт Советы депутатлары Төркия Республикасының Генераль консуллыгындагы Кайгы уртаклашу китабында үз сүзләрен язып калдырдылар.
Парламентарийлар, Әнкарада теракт уңаеннан, Төркия халкына кайгы уртаклашу белдерде. Бу хакта ТР Дәүләт Советының җәмәгатьчелек һәм ММЧ белән үзара эшчәнлек бүлеге хәбәр итте.
Искәртеп үтик: узган шимбә 10 октябрьдә Төркия башкаласында тимер юл вокзалы тирәсендә өч секунд ара белән ике шартлау булды. Соңгы мәгълүматлар буенча, анда 95 кешенең гомере өзелгән, 246 кеше - хастаханәдә.
«Татарстан Респубикасы Дәүләт Советы депутатлары Төркия Республикасы тугандаш халкының, Төркия тарихында иң куркыныч терактларның берсе - Әнкарадагы шартлаулар сериясе уңаеннан, тирән кайгысын уртаклаша. Бу кешелексез җинаятьтә гаеплеләр җәзасын алачагына шигебез юк. Бу фаҗигале көннәрдә Төркия Республикасы гражданнарының кайгысын уртаклашабыз», - диелгән ТР Дәүләт Советы Рәисе һәм депутатлары исеменнән язылган кайгынамәдә. Аны ТР Дәүләт Советы Рәисе урынбасары Римма Ратникова, Мәгариф, мәдәният, фән һәм милли мәсьәләләр комитеты рәисе Разил Вәлиев, парламент аппараты депутатлары һәм җаваплы хезмәткәрләре имзалаган.
Бу уңайдан билгеләп үтик: 12-13 октябрьдә 9.00-18.00 сәгатьләрдә шәһәрлеләр дә Төркия Республикасының Казандагы Генераль консуллыгында кайгы уртаклашу сүзләрен язып калдыра ала.
сылтама:
http://tat.tatar-inform.ru/news/2015/10/12/114479/
Комментарий юк