Исегезгә төшерәбез: 2016 елның икенче яртыеллыгына язылу чоры 18 июньдә тәмамлана. Күп кеше, элеккедән килгән гадәт буенча, почтальонны көтеп газета-журналларга язылуны иң соңгы көнгә калдыра. Ә бит хәзер яраткан газета яки зәвыкълы бизәлешле журналны электрон рәвештә дә яздырып була. Моның өчен “Почта России” сайты яки Дәүләт хезмәтләре (Госуслуги) порталына кереп, тиешле төймәләргә басып, кирәкле матбугат чарасын сайларга һәм банк картасы белән түләргә генә кирәк. Билгеле, почтага барып вакыт үткәреп йөргәнче, мондый ысул күпкә отышлырак.
- Кичә генә үземнең Instagram битендә мин #Подпишиблизких #Подпиширодителей акциясе башлануы турында хәбәр иттем. Ә бүген исә әти-әниемне электрон ысул белән газеталарга яздырып та куйдым. Бу гамәл бернинди дә өстәмә чыгымнар таләп итми, җитмәсә, бөтен процесска ике-өч минут кына сарыф ителде, – дип сөйләде “ТАТМЕДИА” медиаширкәтенең генераль директоры Андрей Кузьмин. – Яшь буын төрле гаджетларга бәйле булса да, өлкән буын кешеләре әле һаман да мәгълүмат белер өчен газета-журналларны көтеп ала. Аларга шундый бүләк эшләп без хәерле гамәл генә кылачакбыз. Бүгеге көндә чыга торган басма матбугат һаман да сыйфатлы эчтәлеге белән үзләренә тартып тора. Алар шулай ук мәдәният һәм тел традицияләрен саклап килә. Минем уйлавымча, без бөтенебез дә басма матбугат чараларына шул рәвешле ярдәм кулын сузырга тиешбез.
.jpg)
Шунысы куанычлы: әлеге акциягә инде республикабызның танылган шәхесләре кушылды. Мәсәлән, Татарстанның сәламәтлек саклау министры Гадел Вафин һәм Дәүләт Думасы депутаты Марат Бариевның әти-әнисен берничә газета һәм журналга яздыруы билгеле. Сүз уңаеннан, мондый ысул белән туганнарны гына түгел, матди ярдәмгә мохтаҗ башка кешеләрне дә яздырып була. Бәлки картлар йорты яки балалар йортларында тәрбияләнүчеләр өчен бу зур бүләк булыр.
Белешмә: ТАТМЕДИА – составына газета, журнал, телевидение, радио һәм интернет басмалар кергән уникаль ширкәт. Татарстанның һәр районында басыла торган 99 газета да әлеге медиаширкәткә карый. Агымдагы елның беренче яртыеллыгында тулаем язылучылар саны 300000 артып китте. Язылу кампаниясе 18 июньгә кадәр дәвам итә.
чыганак
Комментарий юк