28-30 октябрь көннәрендә Татарстанда Мәскәү көннәре узачак. Татарстан белән Мәскәү арасындагы хезмәттәшлек тормышыбызның барлык юнәлешләрендә дә мөһим.
Республикабызда узачак чара уңаеннан тирән эчтәлекле мәдәни программа да әзерләнде. Мәскәү Хөкүмәте һәм Татарстан сәнгать әһелләре катнашында концерт, күргәзмә һәм спектакль тәкъдим ителәчәк.
28 октябрьдә19:00 сәгатьтә Василий Качалов исемендәге Казан дәүләт академия рус Зур драма театрында Мәскәүнең “Новый балет” дәүләт музыка театры “Зимняя роза” спектаклен күрсәтергә җыена.
Чараны оештыручылар хәбәр иткәнчә, Мәскәү көннәренең иң истәлекле вакыйгасы - “Остаз һәм укучы” (“Мастер и ученик”) күргәзмә проекты булачак. Экспозициядә Россиянең халык рәссамы, Россия сәнгать академиясе әгъзасы Сергей Андрияка һәм әлеге мәктәп укучыларының иҗаты белән танышырга мөмкин. Күргәзмәнең тантаналы ачылышы 29 октябрь көнне “Хәзинә” милли сәнгать галереясендә оештырыла. Биредә сәнгать проекты 12 ноябрьгә кадәр эшләр дип тәгаенләнә.
М.Җәлил исемендәге опера һәм балет театрында 30 октябрь көнне 19.00 сәгатьтә Мәскәү сәнгать осталарының зур концерты булачак. Монда “Гжель” бию ансамбле, “SOPRANO Турецкого” арт-группа, “Главная сцена” телепроектының суперфиналисты Ксения Дежнева, Татарстанның атказанган артисты Нурлан Бикмөхәмбетов, виртуоз музыкант Дмитрий Калинин, “Голос” проектында катнашучы Сергей Волчков һ.б.чыгыш ясыячак. Бәйрәм концертын танылган якташларыбыз Максим Шәрәфетдинов һәм Фәридә Корбангалиева алып бара.
Мәскәү Хөкүмәте Казан халкына үзенчәлекле бүләк әзерләгән. Атаклы шагыйребез Муса Җәлил рәсеме шәһәребезнең бер торак бинасын бизәп торачак. 30 октябрь көнне 2нче Газовая урамы, 5 йорт, 1нче корпус янында әлеге проектны күрә алачаксыз.
http://intertat.ru
Комментарий юк