3 декабрь көнне Казанның «Сәйдәш» мәдәният үзәгендә «Йөрәктән — йөрәккә» исемле концерт була. Әлеге хәйрия чарасында татар эстрадасы җырчылары катнаша һәм анда җыелган акчалар Әлмәттә яшәүче күп балалы, әмма яман шеш авыруыннан интегүче Роза Фәтхиевага дәвалану өчен тотылачак.
Розага 39 яшь. 4 нче дәрәҗә һәм органнарга күчүче меланома диагнозын табиблар аңа күптән түгел куйган. Химия терапиясе белән дәвалану Розага туры килмәгән. Анализ нәтиҗәләре Мәскәүгә җибәрелгән. Элек әлеге авыру Израильдә генә дәваланса, хәзер исә меланоманы җиңә ала торган препарат уйлап табылган. Анализ нәтиҗәләре күрсәткәнчә, нәкъ менә ул Розага яман шеш авыруын җиңәргә ярдәм итәчәк.
Препарат белән дәвалануның 1 атналык курсы 115 мең сум тора. Фәхриевлар гаиләсе хәзер дәвалану өчен акча җыю белән мәшгуль. Роза ханымның ире һәм 3 улы − Наил (15 яшь), Камил (8 яшь) һәм Самат (6 яшь) бар.
«Йөрәктән — йөрәккә» махсус программасының режиссеры һәм сценарий авторы — Замирә Рәҗәпова. «Сәйдәш» сәхнәсендә бу кичтә Илназ Баһ, «Зө-Ләй-Лә» триосы, Дилә һәм Булат Нигъмәтуллиннар, Альбина Апанаева, Алсу Әбелхәнова, Резедә Шәрәфиева, Гөлназ Сираева, Мөнир Рахмаев, Нурзадә, Салават Миңнеханов, Гүзәлем, Илдар Әхмәтов, Ильвина, ИлСаф, Сәйдә Мөхәммәтҗанова, Сәнифә Рангулова һ.б. артистлар чыгыш ясаячак, дип хәбәр итә оештыручылар.
сылтама:
http://tat.tatar-inform.ru/news/2015/11/09/115313/
Комментарий юк