Акыллы, талантлы балаларны ачыклау эше республикабызда өстенлекле юнәлешләрнең берсе. Укучыларны ел саен уздырыла торган Бөтенроссия олимпиадасына әзерләү, балаларыбызның анда елдан-елдан ешрак җиңү яулавы моңа дәлил. Олимпиадалар 24 фәннән үткәрелә. Быел ул исемлеккә кытай, итальян, испан телләрен дә өстәмәкчеләр. Бу хакта «Татар-информ» агентлыгында узган матбугат конференциясендә Татарстанның мәгариф министры урынбасары Илдар Мөхәммәтов белдерде. Олимпиадаларның быелгысы инде башланган. Мәктәп этабы сентябрь аенда ук старт ала. Йомгаклау этабы апрельдә узарга тиеш. Быелгы олимпиаданың мәктәпләрдә узган этабында 230 мең укучы катнашкан. Баштарак елларда олимпиада хәрәкәтенә югары сыйныфтагылар гына җәлеп ителгән булса, менә инде ике ел рәттән 4, 5, 6, 7 сыйныф укучылары да читтә калмый. Быел дүртенче сыйныфта укучылар рус һәм инглиз теленнән көч сынаша. Сүз дә юк, балаларны олимпиадага әзерләү күп көч сорый торган эш. Моны истә тотып, 2014 елда Татарстан Мәгариф министрлыгы Республика олимпиада үзәге дә ачты. Республика территориясендә Бөтенхалык олимпиадаларын кабул итүгә дә әһәмият бирелә. Быелның августында Казанда информатикадан Бөтенхалык олимпиадасы узачак. Бөтенроссия күләмендә узучы олимпиадаларның да ким дигәндә икесенең йомгаклау этабын Татарстан ел саен үзендә кабул итәргә тырыша.
Следите за самым важным и интересным в Telegram-каналеТатмедиа
Комментарий юк