​Сәүдә турындагы закон кемне яклый?

Татарстан Дәүләт Советының «Бердәм Россия» фракциясе сәүдә турындагы федераль законның үтәлешен тикшерүгә кереште.

Мәгълүм булганча, 20 июльдә Мәскәүдә «Бердәм Россия» партиясе вәкилләре илдәге аеруча социаль әһәмиятле законнарның үтәлешенә һәм нәтиҗәлелегенә игътибар арттырылачагын белдергән иде. Аерым алганда, «Бердәм Россия» депутатлары тәкъдиме белән кабул ителгән кануннар – сәүдә турындагы закон, кулланышсыз яткан авыл хуҗалыгы җирләрен кулланышка кертү турындагы закон, Урман кодексына кертелгән үзгәрешләр һәм әйләнә-тирә мохитне саклау турындагы законның төбәкләрдә ничек үтәлүен ачыкларга карар кылынды.

Татарстанда бу эшкә Дәүләт Советы депутатлары кереште. Республика парламенты рәисе Фәрит Мөхәммәтшин журналистларга белдергәнчә, «Бердәм Россия» фракциясе сәүдә эшчәнлеге турындагы законның үтәлешен мониторинглау белән шөгыльләнүче төркем төзегән. Аның составына депутатлар, юристлар һәм тикшерү органнары вәкилләреннән тыш, сәүдә өлкәсе өчен җаваплы дәүләт оешмалары, эшкуарлар һәм җитештерүчеләр дә кергән.

Шунысын әйтергә кирәк: сәүдә турындагы күптән түгел яңартылган закон җирле авыл хуҗалыгы җитештерүчеләре, сатучылар, һәм, иң мөһиме сатып алучыларның мәнфәгатен яклау максатын куя. Татарстан депутатлары Авыл хуҗалыгы һәм азык-төлек министрлыгы, эре сәүдә челтәре вәкилләренә мөрәҗәгать иткән инде.

Татарстанда мониторинг төркемен ТР Дәүләт Советының Экология, табигатьне файдалану, аграр сәнәгать һәм азык-төлек сәясәте комитеты рәисе Таһир Һадиев җитәкләде. Федераль дәрәҗәдә исә әлеге социаль әһәмиятле законнарның үтәлешен мониторинглау төркеменә РФ Дәүләт Думасының Куркынычсызлык һәм коррупциягә каршы тору комитеты рәисе Ирина Яровая җаваплы.

– «Бердәм Россия» базардагы һәр як өчен дә гадел шартлар булдыру өчен тырыша. Үз җирлегебездә экологик чиста һәм кайдандыр китерелгәннән арзанрак азык-төлек җитештерүчеләрнең, шулай ук сатучыларның һәм, әлбәттә, сатып алучыларның мәнфәгатен яклаучы законнарның үтәлешен тәэмин итү өчен бүгенге вәзгыятьне ачыклау таләп ителә, – ди Фәрит Мөхәммәтшин. – Бу закон республика авыл хуҗалыгы җитештерүчеләренә үз продукцияләрен эре сәүдә челтәрләре аша сатарга мөмкинлекне арттырыр, сәүдә һәм куллану базарында сыйфатны күтәрер, үз товарларыбызны сату исәбенә бәяләрне авызлыкларга ярдәм итәр, дип өметләнәбез.

«Россия Федерациясендә сәүдә эшчәнлеген дәүләт көйләве нигезләре турында»гы федераль законга һәм Россиянең Административ хокук бозулар турындагы кодексына быел июль аенда үзгәрешләр кертелде. Эре сәүдә челтәрләренең бәяләр сәясәтен тәртипкә китерү, азык-төлек товарларына бәяләрне тотрыклы итеп саклау бурычын куйган бу законнар 2017 елның 17 гыйнварыннан гамәлдә булачак.

Әлеге мәсьәләләр «Бердәм Россия»нең Татарстан төбәк бүлеге сәяси советының чираттагы утырышында да күтәрелде. Фәрит Мөхәммәтшин сәүдә турындагы закон эре сәүдә челтәрләренә генә түгел, шәһәр һәм районнардагы сәүдә нокталарына да кагылуын искәртте.

Үзгәрешләргә килгәндә, мәсәлән, азык-төлек җитештерүчедән аның товарларын кабул итеп алган өчен сатучы акчалата түләүне элекке кебек 10 процент күләмендә түгел, ә 5 проценттан арттырмаска тиеш. Шулай ук әле бу суммага товарларны сатуга әзерләү, эшкәртү һәм капларга тутыру хезмәте чыгымнары да кертелә.

Закон сәүдә челтәрләренең киштәләренә товарларыңны үткәрү өчен «керү билеты» түләүне, ягъни төрле комиссияләрне һәм башка шундый килешүләрне тыя. Моннан соң сәүдә челтәрләре үзләренең интернет сайтларында азык-төлек товарларын кабул итү турындагы килешүләрнең бөтен шартлары турында тулы мәгълүмат язарга тиеш.

– Закон Россиянең Федераль монополиягә каршы хезмәтенең вәкаләтләрен киңәйтә. Монополиягә каршы законнарның үтәлешен тикшерүдән тыш, хәзер аларга сәүдә челтәрләре һәм азык-төлек товарлары белән тәэмин итүчеләрнең хокуклары, бурычлары үтәлешен тикшерү хокукы да бирелә, – ди Таһир Һадиев.

Тикшерү нәтиҗәләре «Бердәм Россия»нең август азагында Россия Президенты Владимир Путин һәм РФ Хөкүмәте рәисе Дмитрий Медведевка әлеге законнарга бәйле вәзгыятьнең торышы белән таныштыручы докладында урын алачак.

http://intertat.ru/tt