Президентны сайлау – республика сәясәтенә референдум

Татарстан Дәүләт Советы Рәисе урынбасары, «Бердәм Россия» фракциясенең Татарстандагы сайлау алды штабы җитәкчесе Юрий Камалтынов белән 13 сентябрьдә узачак бердәм тавыш бирү көне буенча журналистлар өчен матбугат очрашуы булып үтте. Бу көнне федерация субъектлары башлыклары һәм дәүләт хакимияте закон чыгару органнарына депутатлар сайланачак. Татарстан Президенты вазыйфаларына 4 кандидат дәгъва кыла. «Бердәм Россия» партиясеннән Рөстәм Миңнеханов кандидатурасы чыгарылган иде. Татарстан Президентын сайлаулар республика сәясәтенә референдум ул, дип белдерде Юрий Камалтынов һәм Рөстәм Миңнеханов кандидатурасына каршы торырлык реаль кандидатура юк икәнен ассызыклады. Республикада барган уңай үзгәрешләр, матур башлангычлар, зур эшләр һәммәсе Рөстәм Миңнеханов җитәкчелегендә тормышка ашырылуы моңа ачык дәлил. Башка кандидатуралар исә барыннан да бигрәк үз партияләрен ныграк таныту өчен тырыша – 2016 елда Дәүләт Думасына сайлаулар узачак! Юрий Камалтынов шулай ук «Президент белән бергә» хәрәкәте тарафдарлары белән тыгыз элемтәдә эшләүләрен билгеләп үтте, сайлауга килү югары дәрәҗәдә булачагына ышаныч белдерде һәм бердәм рәвештә сайлау участокларына килергә өндәде. Республика җитәкчелеге үткәрә торган сәясәткә теләктәшлек белдереп, сайлауларда актив катнашу – бик мөһим! Без дә шул фикердә!