– Болыт килгәндә яңгырдан качып торабыз да, күк йөзе аязгач, янә урамга чыгабыз, кешеләрне 18 сентябрьдә сайлауларга чакырып, мәгълүмати брошюралар таратабыз, – дип сөйли Казанның Татарстан урамында пикет оештыруда катнашкан Булат Гомәров.
Булат – Казан Идел буе дәүләт физик культура, спорт һәм туризм академиясенең 3 курс студенты, үзен ул “Бердәм Россия”нең “Яшь гвардия” иҗтимагый яшьләр оешмасы әгъзасы буларак таныштыра. Яшьтәшләре белән алар көн саен Татарстан урамында көндезге сәгать 1дән 5кә кадәр “Бердәм Россия”нең агитация материалларын тарата. “Без урамнан үтеп йөрүче кешеләр белән аралашканда бүгенге көндә дәүләт хакимияте эшчәнлеген бәяләп, махсус анкета тутырырга да тәкъдим итәбез. Шулай ук кешеләр үзләрен борчыган сорауларны язмача калдыра ала, без аларны партиянең иҗтимагый кабул итү бүлмәсенә тапшырабыз. Төрле фикерләр ишетергә туры килә: кемдер бөтен нәрсәдән гел зарлана, шул ук вакытта җәмгыятьтә, яшәү шартларындагы уңай якка үзгәрешләрне күреп сөенүчеләр дә юк түгел. Мин үзем әле яшь булсам да, хәтта 2000нче елларга, гомумән, үткәннәргә кайтырга теләмим, киләчәккә өмет белән карыйм, шуңа күрә сайлауларга барачакмын, башкаларны да киләчәккә битараф булмаска чакырам”, – ди Булат.
“Яшь гвардия” егетләре биргән сайлауларга чакыру кәгазьләрен җентекләп караучы өлкән яшьтәге Владимир Бирюков сайлауларга беркайчан да бармый калмавын әйтә. “Быелгы сайлаулар миңа башка еллардагыдан ачыграк оештырылган кебек тоела. Сайлауларга һәрвакыт йөрим, быел да кем өчен тавыш бирәчәгемне беләм, сайлауда катнаша торган партияләрнең, кандидатларның чыгышларын тыңладым, телевидение, газеталар аша сайлау алды программалары белән таныштым”, – ди 77 яшьлек Владимир Бирюков. Яңа хакимияттән ул пенсионерларны кайгыртуларын көтә. “Бүген илнең икътисадын торгызырга, тормыш шартларын яхшыртырга тырышалар, әлбәттә. Шулай да үзем 40 ел заводта эшләп лаеклы ялга чыккан кеше буларак, пенсионерларга игътибарны арттыруларын телим: пенсияләрне күтәрергә, торак-коммуналь хезмәтләр өчен түләүләрнең күләмен киметергә, медицина хезмәтенең сыйфатын үстерергә кирәк”, – ди пенсионер.
Сайлаулар уңаеннан “Бердәм Россия” вәкилләре инде ай ярым элек республикада халык белән очрашулар, акцияләр, пикетлар оештыра башлаган иде. Казандагы интернет-басмаларның берсендә мөхәррир булып эшләүче 23 яшьлек Артем Бабкин урам пикетында таратылган материалларның эчтәлеге белән танышканнан соң, “Бердәм Россия” партиясенең халыктан тәкъдим һәм гозерләрне язмача җыюын уңай бәяләде. “Халыктан гозерләр җыю акциясе беренче карашка бик вак, ләкин кешеләрнең тормышында зур проблемалар тудырган мәсьәләләрне күрергә, аларның чишелешен тәкъдим итәргә мөмкинлек бирә. Мин үзем, шәхсән, торак-коммуналь хезмәтләр күрсәтү өчен җаваплы Идарә компанияләренең эшчәнлеген камилләштерү өчен берничә тәкъдим язып калдырдым, чөнки еш кына үземнең дә әбием мөрәҗәгатьләре буенча Идарә компанияләренә йөрергә туры килә”, – ди Артем Бабкин.
Быелгы сайлаулар алды чорында уздырылган халык белән очрашуларда “Бердәм Россия” вәкилләре 3 меңнән артык тәкъдим һәм гозер җыйган.
чыганак - http://intertat.ru/tt
Комментарий юк