Монреальдә Татарлар Ассоциациясенә рәсми рәвештә 2002 елда нигез салынган
Канаданың Монреаль шәһәрендә эшләп килүче Татар Ассоциациясенә нигез салган шәхес, күп еллар Ассоциациянең җитәкчесе булып торган Талип Кудекига 70 яшь тулды. Бу уңайдан Ассоциация вәкилләре аңа үзенчәлекле бүләк әзерләгән – татар доньясында билгеле булган шәхесләрдән, иҗатчылардан видеокотлаулар яздырып, махсус фильм эшләгән.
Видеокотлауга нигез итеп "Super Tatar" төркеменең “Бик еракта идек без” клибы алынган. Төркем музыкантлары - Казаннан Иркә Гайнемөхәммәтова, Финляндия татары Дәниз Бәдретдин, хәзер Германиядә яшәп иҗат итүче Казан егете Муса Маликов видео аша Талип әфәндене туган көне белән котлап, аңа сәламәтлек тели. Муса Маликов исә Германиядә яшәүче татарлар исеменнән сәлам юллый.
Видеокотлауда Канада татарларының да теләкләре урын алган, алар титрлар рәвешендә бирелә: “Татар милләтенә көч куйган өчен, туган туфрактан ерак яшәп, безне монда берләштергән өчен бездән сезгә олы рәхмәт!” - диелгән анда.
Казаннан кинорежиссер Илшат Рәхимбай: “Алып барган юлыгызның ахыры булмасын! Эшләгән эшләрегез бик изге. Тормышыгыз иҗат белән тулып, ташып торсын”, - дип, Талип Кудекка рәхмәтен җиткерә. Котлау клибында шулай ук шагыйрь, галим, ТР ФА вице-президенты, “Сәләт” яшьләр үзәге җитәкчесе Җәүдәт Сөләйманов та Талип әфәндене юбилее белән котлый. “Мин сезнең үземнең фикердәшем икәнне аңладым”, - ди Җ.Сөләйманов һәм юбилярны Биләрдә узачак “Сәләт” яшьләр форумына кунакка чакыра.
Видеода яңгыраган теләкләргә “Сәләт” яшьләре, “Сабыйлар” үзәгенә йөрүчеләр дә кушылган. Опера җырчысы Илүсә Хуҗина исә, Болгар шәһәрендәге “Ак мәчет” каршына басып, татарларның гимнына әверелгән “Туган тел” җырын башкарып, шулай ук изге теләкләрен юллаган.
Монреальдә яшәүче татар кызы Алимә Сәләхетдинова хәбәр итүенчә, Талип Кудеки бүләккә бик куанган. “Аеруча балаларның татарча шигырь сөйләвен ошатты”, - диде ул "Татар-информ" хәбәрчесенә.
Мәгълүмат өчен. Монреальдә Татарлар Ассоциациясе рәсми рәвештә 2002 елның 4 июлендә теркәлгән. Аңа Талип Кудеки нигез салган. Әлеге шәхес Кытайда туган, 30 яшендә Монреальгә күченеп килгән, биредә гаилә корган, ике бала үстергән.
Монреаль Татар Ассоциациясендә якынча 90 гаилә исәпләнә. Ассоциациянең эшчәнлеге белән интернеттагы чыганаклар аша танышып була. Мәсәлән, чыганаклар арасында Монреаль татарлары тарафыннан 1969 елда оештырылган Сабан туе күренешләрен чагылдырган видеоязма бар.
чыганак
Комментарий юк