ФИНА паркында “Чемпионат гүзәле” матурлык һәм талант конкурсы финалы үтте. Спортның су төрләре буенча ФИНАның 16 нчы дөнья чемпионаты кысаларында 15 кыз таләпчән сайлап алу турын үтте һәм иң позитив, нәзакәтле, талантлы һәм спортны үз иткән кыз исемен йөртү хокукы өчен конкурста тырышты.
Финалга чыккан һәр 15 кызны да җиңүче дип танырга була, чөнки сайлап алу турында 2000 кыз катнашты, ә ярымфиналда – 50. Алар Спортның су төрләре буенча 16 нчы дөнья чемпионатын ачу тантанасында катнаштылар. Кызлар Флаглар парадында ил исеме теркәлгән язуларны тотып бардылар. Конкурс “Татарстан гүзәле” оешмасы катнашында әзерләнгән иде.
“Без барыбыз да укырга, профессиональ яктан камилләшергә, спортта нинди дә булса күрсәткечләргә ирешергә кирәклеген беләбез. Әмма матурлык конкурсы бөтен нәрсәдә аһәңлелек булырга тиешлеге турында да сөйли. Акыллы булырга, чибәрлек белән игътибарны җәлеп итәргә, үзең белән тирә-якты матурайтырга кирәк. Бу һәр кыз өчен мөһим булган сәләт”, - диде “Чемпионат гүзәле” конкурсын оештыручы Изольда Сахарова.
Финалда өч конкурс этабы булды. Башта тамашачылар кызларның видео-визиткаларын карадылар, аннан соң конкурста катнашучыларның су коену костюмында күрсәткән дефилесын күзәттеләр. Соңгы өлештә кызларга алып баручының четерекле сорауларына җавап бирергә туры килде. Конкурс этаплары арасында тамашачыларга концерт да тәкъдим ителде.
Конкурсның жюри составына "Спорт проектлары башкарма дирекциясе"нең мәдәни программалар департаменты җитәкчесе Марат Закиров, “Татарстан гүзәле” оешмасы президенты Изольда Сахарова, “Искушение” бию театрының сәнгать җитәкчесе Рөстәм Надыршин, халыкара йөзү хөрмәте залы вәкиле Ивон Шмит керде.
Бүләкләү тантанасында кызлар дизайнер Султана Салиева тәкъдим иткән “Олимпия” һәм “Воды гладь” авторлык киемнәреннән балкыдылар. Беренче вице-мисс булып Диана Егорова, икенче вице-мисс булып Евгения Кириллова билгеләнде. Шулай ук “Мисс Очарование” һәм “Мисс Зрительских симпатий” исемнәре дә бирелде, аларга Екатерина Гашук һәм Анна Рожина ия булдылар. Ә кыйммәтле таҗны Анастасия Володина киде.
“Дөресен әйткәндә, мин җиңәрмен дип уйламадым да. Ахырга кадәр башка кыз җиңү яулар дигән фикердә идем. Мин беренче вице-миссны әйтүгә үк елый башладым, чөнки үземнең җиңәчәгемне аңладым. Бу көтмәгәндә булды, чөнки бөтен кызлар да чибәрләр һәм төрлеләр. Мин әле дә булса аңышмыйм, әле дә булса ышанмыйм”, - дип сөйләде конкурсның җиңүчесе.
Барлык кызлар да иганәчеләрдән бүләкләр, чәчәкләр алды һәм, әлбәттә, алкышларга күмелде. Ә конкурсның иң шәп 5 кызына шулай ук диадемалар, тасма һәм Спорт төрләре буенча ФИНАның 16 нчы дөнья чемпионатын ябу тантанасына билетлар бирелде. Җиңүчеләр өчлегенә "Aqua Comedy Club"ка билетлар да тапшырылды, дип хәбәр итә Спортның су төрләре буенча ФИНАның 16 нчы дөнья чемпионатының Оештыру комитеты матбугат хезмәте.
сылтама:
http://tat.tatar-inform.ru/news/2015/08/07/112193/
Комментарий юк