15-21 августта Биектау районы Камай авылында урнашкан «Иске Казан» музей-тыюлыгы территориясендә «Иске Казан» талантлы балалар һәм яшьләр палаткалы лагере уздырыла.
«Иске Казан» аланы туган ягыбыз тарихын һәм халкыбызның гореф-гадәтләрен саклап калуга, һөнәрчелек сәнгатен үстерүгә, WorldSkills бөтендөнья стандартлары буенча эшче һөнәрләрен популярлаштыруга юнәлдерелә. Әлеге лагерь Татарстанның Мәгариф һәм фән, Мәдәният министрлыклары, Биектау муниципаль районы администрациясе һәм «Сәләт» фонды белән берлектә тормышка ашырыла.
Бу лагерьда 11-17 яшьлек 170 бала катнаша. Татарстанның WorldSkills чемпионнары балалар өчен төрле мастер-класслар үткәрер, дип планлаштырыла. Остаханәләрдә тимерче, балта остасы һөнәрләренә өйрәнеп, текстиль, керамика эше, робототехника серләренә төшенеп булачак. Шулай ук республикабызның танылган мәдәният һәм сәнгать эшлеклеләре белән очрашулар да уздырылуы көтелә.
20 август көнне аланда Сабантуй форматында «Иске Казан җыены» дип аталган милли бәйрәм оештырылачак. Һәр катнашучының биредә үзенең кул эшләреннән күргәзмә оештыру мөмкинлеге бар. Һөнәрчеләр ярминкәсе һәм Сабантуйга Татарстанның 600 мәктәп укучысы һәм көллият студентлары, WorldSkills Россия чемпионаты призерлары килер дип көтелә.
Чараның мөхтәрәм кунаклары – Татарстанның Яшьләр эшләре һәм спорт министры Владимир Леонов, Мәгариф һәм фән министры Энгель Фәттахов.
сылтама:
http://intertat.ru/tt/society-tt/item/47609-iske-kazan-%E2%80%93-chyin-ostalar-sh%D3%99%D2%BB%D3%99rchege.html
Комментарий юк