Соңгы елларда республикада “Милләтләр кроссы”на зурдан кубып әзерләнү гадәте бар. Һәр төбәктә ярышның үз бизәге, катнашучысы һәм тамашачысы була. Катнашучылар саны күп булганлыктан, төп игътибар, әлбәттә – башкалага! Быел традицион узышлар “Казан Арена” стадионы тирәсендәге мәйданчыкта оештырыла.
Казанда Бөтенроссия йөгерү көненең шәһәр тормышында социаль әһәмияткә ия чара булуының асылын аңлап эш итәләр. Шуңа да ярышларда һәвәскәрләр белән бергә профессионал спортчылар, спорт ветераннары, физик мөмкинлекләре чикле кешеләргә дә катнашу мөмкинлеге тудырыла.
Көннәр матур торса, башкаладагы “Милләтләр кроссы” 20 меңнән дә ким булмаган катнашучыны үзенә җыяр, дип өметләнә оештыручылар. Моңа җирлек тә бар – үзен ярышта сынап карау өчен һәр категория кешегә аерым дистанция билгеләнгән. “Милләтләр кроссы” программасында спортчылар 12, 8, 6, 4 һәм 2 чакрым арага йөгерәчәк. Димәк, елдагыча мәктәп укучылары, яшүсмерләр спорт мәктәбендә укучылар, югары һәм урта махсус белем бирү йортлары студентлары, дәүләт һәм иҗтимагый оешма хезмәткәрләре дә старт сызыгына басачак. Ә спорт сөюче гаиләләр өчен 6-8 һәм 10-11 яшьлек баласы булганнарга гаилә чабышлары үткәрү ниятләнә. Моннан тыш, спорт ветераннары аерым йөгерәчәк.
“Милләтләр кроссы” – көзге спорт төрләре буенча Россия территориясендә үтә торган иң зур ярышларның берсе. Татарстан башкаласыннан тыш, массакүләм чабышлар илнең тагын 84 шәһәрендә үтә.
http://intertat.ru
Комментарий юк