Ихлас сөйләшү

«Сөембикә» журналистлары белән очрашу Казан федераль университетының Лев Толстой исемендәге Филология һәм мәдәниятара багланышлар институты студентлары өчен һәрчак көтеп алынган вакыйгага әйләнә. 

16 июньдә 241 нче аудиториягә исә читтән торып укучылар җыелды. Әдәбияттан лекция урынына... тормыш, яшәеш, татар дөньясы, хатын-кыз матурлыгы кебек мәңгелек кыйммәтләр дәресе булды ул. Кафедра артында «Сөембикә» журналистлары Гөлнур Сафиуллина, Эльмира Закирова һәм Камилә Димөхәммәтова иде. Аудиториядә утырган 50 ләп студент (күбесе мәктәптә укыта, шактые – әни кешеләр) әдәбият, шигърият, язучылар, билгеле шәхесләр турында рәхәтләнеп тыңлады. Ир-атларның хатын-кызлар турында ни уйлавын ярып сала торган «Без һәм алар», кайчан да яратып җырлана торган җырларыбыз турындагы «Бер җыр тарихы», Хатын-кыз галәме сәхифәләре, гыйбрәтле язмышлар, укучылар хатлары, психолог, юрист киңәшләре дә һәр ай саен көтеп алына икән. (Бу хәбәрне сөенеп кабул иттек!) Күпләр «Сөембикә»не сайттан укый булып чыкты. (Күбесе яшьләр шул!) Бала тәрбияләүгә кагылышлы сораулар аеруча күп яңгырады. (Очрашуда милләт әниләре утыра икән ләбаса!) Ихлас сөйләшеп-аралашып, укучыларыбыз да, үзебез дә сәгатьтән артык рәхәт дулкында йөздек. Җылы сүзләр – күңелгә, якты йөзләр фотосурәткә күчеп калды.