​Дөнья чемпионаты ярышларына ничек барырга?

Бу турыда журналистларга Казан башкарма комитетының транспорт һәм элемтә комитеты рәисе Айдар Абдулхаков хәбәр итте. Ул китергән мәгълүматларга караганда, Су спорты төрләре буенча дөнья чемпионатына әзерлек кысаларында башкаланың җәмәгать транспортын санитар-техник яктан яхшырту буенча шактый зур эш башкарылган.

- 77 транспорт чарасында чатнаган тәрәзәләр алыштырылды, 42 автобусны яңадан буяу карары кабул ителде. Автобусларны төзекләндерү дә шактый вакытны алды. Нәтиҗәдә, 10 июльгә җәмәгать транспортын әзерләү буенча эшчәнлек ахырына якынлашты. Дөнья чемпионаты чорында халыкка 842 автобус, 207 троллейбус һәм 107 трамвай хезмәт күрсәтәчәк, - дип ассызыклады Айдар Абдулхаков.

Машина йөртүчеләрне һәм кондукторларны әзерләүгә аеруча зур игътибар биргәннәр. Аларның барысы да квалификация күтәрү буенча махсус курслар узган. Өстәвенә, чемпионатка әзерлек кысаларында йөртүчеләр өчен - 900, ә кондукторлар өчен – 500 яңа комплект форма тегелгән.

Җәмәгать транспорты спорт объектларына кадәр бара

Җәмәгать транспорты эшчәнлеген яхшыртуга зур игътибар бирү аңлашыла, чөнки шәһәр халкын һәм кунакларны спорт объектларына алып бару белән нәкъ менә алар шөгыльләнәчәк. Спорт ярышына билеты булганнар ул көнне автобус-троллейбусларда бушлай йөрү хокукы ала. Ә волонтрелар исә, гомумән дә, бушлай хәрәкәт итәчәк. Ник дигәндә, алар өчен махсус транспорт карталары әзерләнгән.

- Казанның җәмәгать транспорты дөнья чемпионаты ярышлары уздырыла торган объектлар аша узсын өчен барысы да эшләнде. Шул рәвешле, әлеге спорт биналарына шәһәрнең теләсә-кайсы ноктасыннан бернинди күчеп утыруларсыз яки күп дигәндә ике автобуста барып җитү мөмкинлеге тудырылды, - дип ассызыклады Айдар Абдулхаков.

Тагын бер яңалык: 54нче номерлы автобусның хәрәкәт схемасы бераз үзгәртелгән. Чемпионат чорында ул Су спорты төрләре сараена кадәр барачак. Бу – Вахитов һәм Яңа Савин районында яшәүчеләрнең «Казан-Арена» һәм Су спорты төрләре сараена кадәр баруын тәэмин итү максатыннан эшләнгән.

- Шул рәвешле, «Казан-Арена»га 54, 75, 74 һәм 74а автобусларында барып җитеп булачак, - дип дәвам итте сүзен җитәкче.

Өстәвенә, бу чорда шәһәр халкы һәм кунаклары өчен «кайнар линия» телефоны эшләячәк. Теләге булган һәркем 275-30-50 номерына шалтыратып, автобус маршрутлары, теге яки бу объектка барып җитү ысуллары турында белешә ала.

Сибгать Хәким урамы вакытлыча гына ябыла

Казан шәһәре ЮХИДИ идарәсе җитәкчесе Игорь Новиков исә дөнья чемпионаты чорындагы башкала юлларындагы үзгәрешләр турында сөйләде. Җитәкче сүзләренә караганда, юлларны вакытлыча ябу кебек чара Сибгать Хәким һәм Абдулла Бичурин урамнарына гына кагылачак. Хәрәкәт исә Сибгать Хәким урамында Мусин урамыннан алып Әмирхан проспектына кадәр ,ә Абдулла Бичурин урамында исә Сибгать Хәким урамыннан Чистай урамына кадәр тыелачак. Шунысы мөһим, бу урамнар 24 июль һәм 9 август көннәрендә иртәнге 6:00 дән 23:00гә кадәр ябыла. 22 июль көнне исә бирегә 15:00 дән алып 23:00 гә кадәр кереп булмаячак.

Гомумән, ЮХИДИ идарәсе вәкилләре дөнья чемпионаты чорында халыкны шәхси машиналардан түгел, ә җәмәгать транспортыннан файдаланырга өнди. Әгәр дә инде кеше «тимер ат»ыннан аерылырга теләми икән, ул машинасын «Тандем», «Metro», «Максидом», «Южный», «Мега» сәүдә үзәкләре һәм «Казан» агропромпарк паркингларында калдыра ала (спорт объектлары янындагы паркинглар ябык булачак). Әлеге урыннарда халыкка махсус автобуслар хезмәт күрсәтәчәк: спорт объектларына ярыш карарга баручы халыкны күчерү белән 17 транспорт чарасы шөгыльләнер дип уйланыла.

сылтама: http://intertat.ru/tt/sport-tt/item/46543-d%D3%A9nya-chempionatyi-yaryishlaryina-nichek-baryirga?.html