Җиләкле беләзек

Кирәк: 

* Кызыл, сары, яшел, әфлисун, ак, көрән төстәге пластик;
* чылбыр;
* каптырма;
* штифтлар (кыл белән дә алмаштырып була);
* каргаборын;
* лак. 



Төсләрне кушып, яңа төсләр китереп чыгару мөмкинлеге турында да онытмагыз.

Мәсәлән:
кызыл+сары=әфлисун;
кызыл+яшел=көрән;
зәңгәр+кызыл=шәмәхә;
кара+ак=соры; 
ак төсне кушып ачык төсләр ясала.

Эш барышы:

Алма (груша да шундый принцип белән ясала).

Ачык яшел төсне алып изәбез, шарчык тәгәрәтәбез.

Куе яшел төсле пластикны изеп, роллер ярдәмендә җәябез (1-1,5 мм калынлыкта).

Шарчыкны җәелгән пластик кисәгенә төрәбез. Бармаклар белән тигезләп, шарчыкны формалаштырабыз, аны икегә бүләбез.

Стека ярдәмендә алма уемнары ясыйбыз.

Алма эчлеген ясыйбыз, көрән пластиктан төшләр ябыштырабыз.

Алманы энә ярдәмендә тишәбез (эшләнмәне суытып алу файдалы — тишкәндә, кулыгызда изелмәс), тигезлибез.


Әфлисун 
Әфлисун төсендәге пластиктан шарчык тәгәрәтәбез (әлеге төс әз икән, алма техникасын искә төше­реп, эченә калдык-постыктан шарчык тәгәрәтеп, әфлисун төсендәге пластикка төреп куя алабыз). Энә ярдәмендә тишәбез.

Кабыгын ясагач кына энәне тартып алабыз.
 
Яфрак
Яшел пластиктан шарчык тәгәрәтәбез. Ямьшәйтәбез. Бер кырыен чеметеп алабыз.
Стека ярдәмендә ике яктан да тамырлар ясыйбыз.Энә ярдәмендә тишәбез.

Барлык җиләкләребезне шырпы очына кидертеп, әзерләп куелган җирлеккә (бөке, фольга) урнаштырабыз. Салкын мичкә куябыз, мичне кабызабыз (130 градуска кадәр җылытып, 30 минут тотабыз). Мичтән чыгаргач, шырпыларын алып, суытабыз. 

Лак белән буйый­быз. Җиләкләрне чылбырга тагып чыгабыз. 

 Моны белергә кирәк:
* эш алдыннан һәм эштән соң кулыгызны яхшылап юыгыз;
* пластикның куе төсләре белән эшләгәннән соң, ачык төсләргә тотынмагыз – пычратырсыз!
* әгәр дә мичегездә градуслар билгеләнмәгән икән, минимумга куеп, 10-15 ми­нут тотыгыз. Җиңелчә ис чыгуга, мичне сүндерегез. (Эшләнмәне җиңел генә кысып карагыз, йомшак икән, тагын пешерергә кирәк.) Кечерәк эшләнмәне мич­-тә әзрәк тотыгыз. Төтен һәм ис чыгып, эшләнмәләрегезнең төсе ямьсезлән­гән икән, димәк, яндыр­гансыз.
Тәрәзә-ишекләрне ачып бүлмәне җилләтегез, өстәлдә калган ризыкны ашарга ярамас. Эшләгәннән соң мичне яхшылап юыгыз.