Җәй үтеп тә китә. Аның каравы, җәйге җылы көннәрне сагынганда татлы карбыз ашап рәхәтләнү мөмкинлеге калды.
Карбыз чынлап торып август, сентябрь айларында өлгереп җитә. Иртә өлгергән карбызга кызыкмавың хәерле.
Өлгергән карбызның койрыгы гына түгел, койрык төбе дә корыган булырга тиеш.
Өлгергән карбызны кыссаң, ул шытырдый, чиртсәң – тавышы яңгырый.
Агрономнар артык зур карбызга кызыкмаска киңәш итә: җиде килодан арткан карбыз нитратлар сибеп үстерелгән булырга мөмкин.
«Дөрес» карбызны кисеп җибәргәч, аның шикәре ярмаланып торуы күренә. Нитратлы карбызның җепселләре юан һәм саргылт була.
Химияле карбызлар озак сакланмый. Аның кабыгында караңгырак төстәге йомшарган урыннар пәйда була. Андый карбыз үзе кызыл булса да, төшләре ак кала.
Карбызны өйдә тикшереп карарга да мөмкин. Моның өчен карбыз йомшагын бер стакан суга салыгыз. Нитратлы карбыз суны ал төскә кертер, чистасы исә болганчыклатыр гына.
Кайнатма ясау
1 кг карбыз кабыгы өчен бер кило ярым шикәр, 2 г лимон кислотасы кирәк булыр. Карбызның өске кабыгы әрчелә, фәкать яшел кабыгы гына калдырыла. Шуны шакмаклап турап, кайнап торган суда ике минут пешерәсе. Ике стакан суда шикәр эретелә. Шуның өстенә пешереп алынган карбыз кабыгы салына, һәм ул үтә күренмәле булганчы пешерелә, өстенә лимон кислотасы сибелә. Зөбәрҗәт төсендәге кайнатма хасил була.
Карбызлы туңдырма
Карбыз йомшагын һәм пломбирны шакмаклап турыйбыз, кура җиләге белән аралаштырабыз, шикәр комы сибәбез. Матур савытка салып, өстенә чикләвек ваклап сибәбез.
Цукат ясау
Карбыз кабыгын шакмаклап турыйбыз. Шуны кайнар суда пешереп алабыз. Аннары 10 сәгатькә шикәр ширбәтенә салып куябыз (бер кило ярым шикәргә 4 стакан су), тагын бер кат пешерәбез. Пешеп җиткәндә, бер чәй кашыгы лимон кислотасын һәм пычак очы белән генә алынган ванилинны өстибез. Кайнар карбыз кабыкларын киң савытка бушатабыз, ширбәте агып беткәнне көтәбез. Аннары өстенә шикәр оны сибәбез.
Болгатабыз да кибәргә калдырабыз. Әзер цукатларны пыяла банкада яки кәгазь пакетларда саклыйбыз.
Карбыз балы
Карбыз сутын күләме биш тапкырга кимегәнче кайнатабыз. Шуннан соң карбыз балы хасил булыр. Суыткычта саклыйсы.
фото:
http://pixabay.com
Комментарийлар
0
0
Карбыз кабыгыннан менә дигән кайнатма ясап була. Кабыгының йомшак җирен шакмаклап турап, кайнап чыккан сиропка салып, 20 минут чамасы кайнатырга. Суыгач, вак банкаларга тутырырга. 1 кг карбыз кабыгына 700 г шикәр комы кирәк.
0
0