Тарихи вакыйга: Кәрим Тинчурин исемендәге Татар дәүләт драма һәм комедия театры 38 елдан соң кабат камаллылардан калган бинага күченеп, яңа тарихын башлап җибәрде. Һәм ул бу чорны яңа сулыш дип атады. Яңа бина гына түгел, труппаны яшь, амбициоз популяр режиссер Айдар Җаббаров җитәкли башлады. Бу – үзе үк хыял. Тагын бер хыяллары, мөгаен, татар мохите уртасында утырган бинада татар дөньясында беренче номерлы театр булу. Моның өчен бөтен шартлар бар кебек. Тинчуриннар шул хыялларына җырлап-биеп барырга чыкты. Беренче премьераларының нәкъ менә «Хыял артыннан» дип аталуының ишарәсе дә шуңа түгел микән?
