– Мин армиягә китәм! Мәктәпне тәмамлап югары уку йортына укырга кергән улларыннан мондый сүзне ишетүгә Лилия һәм Альберт САФИУЛЛИНнар аптарып та кала. Тормышы көйләнеп барганда гына... Аннан соң егетләрнең үз теләкләре белән хәрби хезмәткә китә торган заман да түгел... Әмма егет сүзе бер була. Ә Айнурныкы әле чакма ташы кебек каты да. Әйтте – бетте. «Ул ир-егет. Шулай тели икән, аның фикерен хөрмәт итәргә тиешбез», – ди Әфган сугышы ветераны булган әтиләре. Бүген батальон командиры, майор Айнур Сафиуллин – Россия Герое. Герой әнисе генә түгел Лилия ханым, үзе дә герой әни. Биш ир бала тәрбияләп үстергән әни ул!
