Ике баласы белән тәрәзәдән сикергән  

Мәскәүдә 36 яшьлек әни ике баласын тотып, 9 нчы каттан сикергән. Ул үлемендә  беркемне дә гаепләмәскә кушып, язу калдырган. 

Бәхетле бала, ике бала, кайгыртучан ата.  Үзенең һәм балаларының гомерен өзәргә карар кылган Людмила Соколованың социаль челтәрләрен карагач, әнә шундый уй туа. Без һәрберебез, бигрәк тә, бала ялында булучылар,  тормышыбызның матур якларын  социаль челтәрләрдә күрсәтергә тырышабыз,  бары тик шатлыклы мизгелләр чагылган фотолар гына куела анда. Бәлки, шул рәвешле Людмила кебек  без дә үз-үзебезне юатырга, алдарга тырышабыздыр. Әнә бит аның да гаиләсе белән төшкән фотолар, аларга матур, күңелле шәрехләмәләр. Кызлары  тугач,  ана социаль челтәрләренә: «Без күбәйдек, яшәү тагын да матурланды» дип язып куя. Әнә ул ире белән   кызлары тууын бәйрәм итә. Аңа кадәр көмәнле вакытында ире, улы  белән  фотосессияләр... Бар да яхшы кебек!  

Тик менә шушы ана көннәрдән бер көнне тәрәзәдән сикерә, берүзе генә түгел, ике баласы белән. «Беркемне дә безнең үлемдә гаепләмәгез, иремне төрмәгә утыртмагыз», – дип язу калдыра ул.  9 айлык сабые да, үзе үлә дә, ә  өч яшьлек улын авыр хәлдә реанимациягә озаталар. Иртән эшкә чыгып киткән иргә, ярты сәгатьтә үтми, фаҗига турында хәбәр итәләр. Тиз арада кайтып җиткән әти кешедә истерика башлана, аңа  табиблар ярдәм итә.  Телеграмм-каналлларда язуларынча, ире Людмиланың авырлык белән бала табуын, соңгы айларда аның  үлем турында сөйләгәннәрен әйтә.  

Хәзер психологлар, ана бала тапканнан соң була торган депрессиядә яшәгән, дип фаразлыйлар.  Бу халәтне күпләр авыруга санамый, аны дәвалау өчен  хастаханә юлын таптамый, бигрәк тә кичә генә бала табу  йортыннан чыккан  аналар. Ә  мондый депрессия – күпләрдә. Өйгә яшь бала кайткач, дөнья аның тирәсендә әйләнә башлый. Ана онытыла.  Сабый янына участок  шәфкать туташ, табиб килә. Алар бала хәле белән кызыксына, ананыкы белән түгел. Яшь әтинең  дә  өйдә кечкенә йомгак барлыкка килгәннән соң  үз хәле хәл:   хәзерге ролен, нишләргә кирәклеген аңлап бетерми, баладан курка. Ярый да әле хатынына үпкәләп йөрмәсә.  Ярдәм итәргә килгән әни-кайнаналар да онык тирәсендә генә бөтерелә: «Синең хәлең ничек соң, балам?» – дип бик сирәк сорыйлардыр. Аякта, димәк, исән!  Ә яшь әнинең җанында ни уйнаганын беркем белми.  Кайбер яшь әниләрнең бердәнбер юанычы – социаль челтәрләр. Ә анда, белгәнегезчә, бары тик гламур тормыш. Депрессиядәге кешегә анда, гомумән, керергә ярамый. Бала тапканнан соң депрессия белән интеккән кеше буларак шуны әйтә алам: бу хакта эчтән генә янып,  уйланып йөрү файдасыз. «Миңа ярдәм итегез, хәлем авыр», дип чаң кагудан, якыннарыгыз белән бергә бу халәттән чыгу юлларын эзләүдән курыкмагыз. Депрессиядән бары тик булышырга дип якыннар кул сузганда гына чыгарга мөмкин. Киресенчә икән, бер генә  чыгу юлы кала  – тәрәзә.