Бәхетсезлекме, битарафлыкмы? 

Удмуртиянең Можга шәһәрендә балалар церебраль параличыннан интегүче  13 яшьлек малай вафат булган. Әлеге факт Удмуртия республикасы башлыгы Александр Бречаловка кадәр барып җиткән, ул исә регионның хакимият рәисенә һәм Удмуртиядә бала хокукларын саклау буенча вәкаләтле вәкилгә бу хәл буенча тикшерү уздырырга боерган. 

Әйтегез әле, безнең арадан ничәбез генә күршедә кем яшәве һәм ябык ишекләр артында ниләр булып ятуы белән кызыксына? Чит фатирдан килгән таваышларга да күп очракта, минем эшем түгел, кирәк дип тапсалар, полиция чакыртырлар дип үтеп китәбез. Фаҗиганең төп сәбәбе дә бу очракта – битарафлык. Тумыштан гарип, өстәвенә эпилепсия өянәкләреннән җәфаланучы малай бер атна буе кешеләрне ярдәмгә чакырган. Аның тилмереп кычкыруын күршеләре дә ишеткән, әмма моңарчы да авыру бала шактый тавышлы булганга, берәү дә туктап, бу бала ник кычкыра соң дип уйламаган. Инде 30 ноябрьдән бирле күршеләренең ишеге ачылмауга, кергән-чыккан кеше булмауга да  игътибар итмәгәннәр.  
Баланың өенә килеп белем бирүче педагоглар 6 декабрь көнне чаң какмаса, ул ишек тиз генә ачылмас та иде, мөгаен. Ике көн рәттән ишекне ачучы булмагач, педагоглар полиция чакырта. Фатирдагы тамашадан чәчләр үрә торырлык. Ике бүлмәдә – ике мәет. Бала үзенең фаҗигале үлеменә кадәр атнага якын әнисенең җансыз гәүдәсе белән яши. 51 яшьлек әни кешенең нидән үлгәнлеге әлегә билгеле түгел,  саусызлыгы сәбәп булырга мөмкин. Ачлыктан, сусаудан тилмергән бала башта ярдәмгә кешеләрне чакыра. Фаразларга караганда, ишетүче, керүче булмагач, урында гына ятучы, бөтенләй дип әйтерлек хәрәкәтләнә алмаучы бала ничек итсә итеп, кухняга кадәр чыга, кранны ачып су эчмәкче була. Күрәсең, шул вакытта өянәге башланып, идәнгә егыла. Ябылмый калган краннан аккан салкын су башта раковинаны тутыра, аннары – бөтен фатирны. Фатир беренче катта урнашканга, су басуны да беркем белми кала. Полиция хезмәткәрләре баланың җансыз гәүдәсен шунда – кухня идәнендә салкын су эчендә яткан килеш таба.  Ул артык туңуы аркасында җан биргән, дип фаразлана. 
Бүген әлеге эш буенча Тикшерү комитеты җинаять эше кузгаткан.