​Ак үлемгә каршы

Төрле наркотикларның кеше организмына төрлечә һөҗүм итүе турында күпләр белеп тә бетерми.Әйтик, героин куллана башлаган наркоман энәгә «утыра» да инде бүтән аннан ычкына, элеккеге тормышына кире кайта алмый. Санаулы гына еллар эчендә ул хәлсез бер картка әйләнә дә куя. Дезоморфин дип аталган наркотик тагы да куркынычрак: канга эләккәннән соң аның бер өлеше эреп организмга тарала, икенче өлеше тромб китереп чыгара. Һәм яшен тизлегендә гангрена башлана. Наркотикның агу икәнлеген  һәм аның кешене санаулы көннәр өчендә үлем түшәгенә салуын беләбез.

Татарстан Республикасы буенча Эчке эшләр министрлыгының Наркотиклар әйләнешен контрольдә тоту буенча идарә начальнигы Вадим Александрович Костюнин синтетик наркотикларның 168 төре мәгълүм булуын әйткәч, бу кармакка эләгүчеләрнең хәлен күз алдына китерүе бер дә кыен түгел. Полиция подполковнигының сөйләвенә караганда, быелның ун ае эчендә наркотиклар таратучы 1340 кеше тотылган. Аларга каршы законнар бик кырыс: 20 елдан «пожизненно»га кадәр.

Соңгы ун елда наркотикларга килгәндә, вазгыять киеренке кала бирә. 2016 елның 1 октябренә наркология диспансерында исәптә торучыларның саны 18479 кеше тәшкил итә. Шулай да үлем-китемнәр, 2010 елдан алып 3,2 мәртәбә кимегән.

Тәмәке катнашмасы дип кабул ителгән «спайс» та бик куркыныч. Кайберәүләр аны зарарсыз үлән дип уйлыйлар. Ләкин бу алай түгел. Кыска гына вакыт эчендә бавыр эштән чыга. Кешенең йөзенә сары коела, баш миендәге нейроннар үлә. 

Наркотиклар әйләнеше белән бәйле җинаятьләр өчен хөкемгә тартылучыларга җитди җәза каралган. Бер мәртәбә марихуана тартып карауның да зур бәлаләргә китерүе, озак еллар төрмәдә утыру белән әйләнеп кайтуы турында онытмагыз.