«Аделина, Рәминә, Самат, Тимур, Булат, Милена, Икром, Анфиса – бу балалар инде беркайчан да мәктәпкә бармаячак!» Министрлар Кабинетында узган чираттагы брифингта Татарстанның баш автоинспекторы Рөстәм Гарипов чыгышын әнә шундый җанга тия торган сүзләр белән башлады.
Соңгы ун елда республикада юл-транспорт һәлакәтләрендә 148 бала үлгән. Агымдагы елның җиде аенда гына да 225 авария булып, аларда 242 бала төрле дәрәҗәдә тән җәрәхәтләре, 8 бала якты дөнья белән хушлашкан.
Рөстәм Гарипов әйтүенчә, алар үлемендә, нигездә, балалар утырган машина йөртүчесе гаепле. Күп очракта рульдә аларның әти-әниләре һәм балалар тиешенчә эләктерелмәгән була. «Автокреслолар – инспекторлар өчен кирәкми, штрафтан качу чарасы да булырга тиеш түгел, ул балалар куркынычсызлыгы өчен», – диде баш автоинспектор.
Транспорт чарасын йөрткән балалар гаебендә дә аварияләр булып тора. Балалар арасында электр самокатлары урынына хәзер питбайклар, ягъни кечкенә мотоцикллар популярлаша. Инспекторлар фикеренчә, алар артык кыйммәт түгел, ә икенчедән, бу транспорт чарасына теркәү уздырырга кирәкми. Шуңа аның республикада күпме икәнен белүче дә юк.
Бүгенге көнгә Татарстанда питбайкта авариягә очрап өч үсмер һәлак булган. Аның берсенә кечкенә мотоциклны әти-әниләре туган көненә бүләк иткән була. Димәк, үзләре дә аңламыйча, ата-аналар үлем бүләк итә. Баш инспектор мондый бүләкләр бирүдән тыелырга киңәш итә. «Балага мототехника алып бирү – рулетка уйнауга тиң ул», – ди.
Фото: Министрлар Кабинетының рәсми сайтыннан алынды.
Следите за самым важным и интересным в Telegram-каналеТатмедиа
Чулпан ГАЛИӘХМӘТОВА,
Комментарий юк