– Үземнән беркайчан да канәгать булганым юк… – ди ул. Әйе, бу әңгәмәне Наилә ханым: «Мин күн мозаикасына яңа сулыш өрдем, бу сәнгать төрен яңа биеклеккә күтәрдем... Эре җөйне гамәлгә керттем, җөйсез читек тегүнең борынгы технологиясен торгыздым», – дигән сүзләр белән дә башлый ала иде. Һәм хаклы булыр иде! Татар каюлы күн өлкәсендә иҗат итүче әйдәп баручы рәссамнарның берсе бит! Казан кызы ул. Иҗади гаиләдә үсә. Әнисе Асия Хәйруллина – Татарстанның атказанган артисткасы. Әтисе Халит Кумысников – сәнгать белгече, танылган театр тәнкыйтьчесе, татар театрын өйрәнгән иң зур галимнәребезнең берсе. Наилә дә шунда – театрда эшләргә тиеш була, әмма язмыш аны башка сукмакка алып кереп китә... Театр һәм гамәли-бизәлеш сәнгате рәссамы Наилә Халит кызы КУМЫСНИКОВАның Татарстанның атказанган сәнгать эшлеклесе, Татарстанның халык рәссамы дигән мактаулы исемнәре бар. Б. Урманче исемендәге бүләк лауреаты ул. Без аны «Болгари» беренче халык нәфис кәсепчелек иҗат остаханәсен оештыручы дип тә хәтерлибез. Казан Кремлен казу вакытында табылган болгар костюмын һәм XVI йөз татар гаскәриенең сугыш кирәк-яракларын реконструкцияләүне аңа тапшырулары белән дә горурланабыз. Журналыбызның «Сөембикә беләзеге» авторы да – Наилә ханым Кумысникова. Аның бер генә хезмәте дә башкаларныкына охшамаган: гаҗәеп нәфис, милли һәм искиткеч югары дәрәҗәдә эшләнгән. Тагын – Тукай премиясе белән дә яшьтәш ул. 1958 елда әнисе Асия Хәйруллинага берьюлы ике бәхет елмая: республиканың иң дәрәҗәле бүләгенә лаек беренче лауреатлар арасына да эләгә, кызы да туа.
