«Йолдызлы билет кемгә булачак?»

Бүген сәгать 17.30да Казан ратушасында «Аксенов-фест-2015» фестивале кысаларында «Яңа татар шигърияте антологиясе» китабын тәкъдим итү чарасы үткәрелә. Ул музыкаль спектакль рәвешендә узачак. Татар һәм рус телләрендә дөнья күргән басмага 22 татар һәм 8 рус шагыйренең иҗат җимеше кергән. Аерым алганда, яңа буын татар авторларын бүгенге рус шагыйрьләре, үзләренә ошаган әсәрләрне сайлап алып, тәрҗемә иткән. Мәскәүдәге «Октябрь» журналы редакциясе, шагыйрьләр, тәрҗемәчеләр, мөхәррирләр һәм рәссамнарның уртак хезмәте булган ике телдәге әдәбиятны берләштерү – проектның төп максаты.

Искәртеп үтик: «Аксенов-фест-2015» фестивале Казанда 9 сентябрьдә ачылды. Бу көнне Евгений, Александр Кабаков проза, Виктор Куллэ шигърият буенча мастер-класслар үткәрде. Шул ук көнне язучы Алисә Ганиева, шагыйрә Ирина Ермакова, язучы, журналист, драматург Денис Драгунский белән иҗади очрашулар уздырылды, «Жених и невеста» китабы презентацияләнде. Фестивальне ачу көнендә «Василий Аксенов – архивтан хикәяләр» дип исемләнгән чара, Элен Мела катнашында «Заманча француз әдәбиятында яңа юнәлешләр һәм Василий Аксенов» дигән темага очрашу булды.

10 сентябрь шулай ук әдәби чараларга бай иде. Бу көнне, аерым алганда, Ирина Ермакова шигърият, Алисә Ганиева һәм Александр Снегирев, Денис Драгунский проза буенча мастер-классалар уздырды. Гүзәл Яхина белән иҗади очрашу һәм аның «Зулейха открывает глаза» романын тәкъдим итү чарасы булды. «Укучыда һәм наширдә ихтыяҗга ия темалар. Язучы, нашир һәм укучы кызыксынуларының туры килүе» темасына түгәрәк өстәл, язучы Александр Кабаков һәм шагыйрь Виктор Куллэ катнашында иҗади очрашулар үткәрелде.

Иртәгә көндезге 11дә шулай ук Казан Ратушасында «Звездный билет» премиясен тапшыру тантанасы уздырыла. Әлеге премия Казан мэры Илсур Метшин тарафыннан «Аксенов-фест» фестивале кысаларында гамәлгә куелган иде. Ул әдәбият һәм сәнгать өлкәсендә яшь талантларны ачыклау һәм кызыксындыруга юнәлтелә. Премиянең үзенчәлеге шунда - сәләтле яшьләрне Татарстанда гына түгел, Россия, БДБ илләре һәм чиктәш илләрнең әдәбият картасы буенча да эзләү. Попечительләр советы әйдәп баручы язучылар, тәнкыйтьчеләр, музыкатлардан гыйбарәт, алар арасында – Александр Кабаков, Евгений Попов, Ирина Барметова.

Искәртеп үтик: «Звездный билет» премиясе лауреатлары булып Казан язучылары Денис Осокин (проза) һәм Анна Русс (шигърият), Мәскәү прозигы Евгений Бабушкин һәм әрмән шагыйре Арутюн Рвакимян, шулай ук Александр Снегирев һәм Тәлгать Баталов танылды.

Фестиваль иртәгә, Василий Аксенов бакчасын ачу уңаеннан, 1дән кичке 6га кадәр оештырылачак әдәби-музыкаль программа белән ябыла.

сылтама: http://tat.tatar-inform.ru/news/2015/09/11/113404/