​Мәктәп балалары ярминкәгә чакыра!

Ялларда үткәрелә торган авыл хуҗалыгы ярминкәләренә яратып йөри башкала халкы! Шулай булмыйни! Атна буена ашар ризыгын шуннан җыя да кайта бит ул! Итен, балыгын, бәрәңгесен, йомыркасын, эремчеген, яшелчәсен, онын, ярмасын... Бердән, арзан; икенчедән, уңайлы, өченчедән, экологик яктан чиста...
Ә менә 24 сентябрьдә авыл хуҗалыгы белгечләре әзерли торган колледж-техникумнарда укучылар, мәктәп балалары үзләренең традицион ярминкәсенә чакыра. Елдагыча, Казанда һәм Чаллыда зурлап үткәрәчәкләр бу чараны. Алар үзләре җитештергән продукцияне сатачак.  100 тонна бәрәңге, 21 тонна чөгендер, 21 тонна кәбестә, 25 тонна кишер, 1 тонна сарымсак... Татарстан Республикасы мәгариф һәм фән министрының беренче урынбасары Поминов Андрей Иванович сүзләренә караганда, уку йортларының үз ярдәмче хуҗалыклары бар. Умарта да тоталар, куяннар да үрчетәләр, яшелчәләр дә үстерәләр. Сатудан кергән акча мәктәп-техникумнарга җиһазлар, әсбаплар алуга тотылачак. Ярминкәдә республиканың 41 районыннан 200 мәгариф учреждениесенең катнашуы көтелә. Матур итеп бизәлгән урыннарда егетләр-кызлар үзләре җитештергән уңыш продукциясен тәкъдим итәчәк, ярминкә җыр-бию, концерт номерлары белән үрелеп барылачак. Волонтерлар сатып алучыларга ярдәм оештырачак. Иртәнге 8 дә Агропромпарк мәйданында чып-чын сәүдә бәйрәме гөрләячәк. Республиканың Мәгариф һәм фән министрлыгы белән Авыл хуҗалыгы һәм азык-төлек министрлыгы вәкилләре сәүдә рәтләрен карап узачак. Иң матур урынга, иң шәп товарга, иң актив мәктәпкә, иң бай концерт программасына бүләкләр, рәхмәт хатлары тапшырачаклар. 
1985 елдан бирле үткәрелеп килә торган бу көзге бәйрәмне күпләр көтәдер. Мин дә көтәм.  Мәктәп елларында без дә шулай бәрәңге, чөгендер, кишер, суган үстерә идек. Мәктәп ашханәсен ел буе җитәрлек азык белән тәэмин итә идек. Үзенә күрә балачакны сагыну бәйрәме дә булыр ул ярминкә, көзге муллыкка, җыелган уңышка сөенү көне дә булыр.