7 октябрьдә Г. Камал исемендәге татар дәүләт академия театры 111 нче сезонын ачып җибәрә. Традиция үзгәрми – ул көнне дә сәхнәдә «Зәңгәр шәл» уйналачак. Аныңчы, 16 сәгатьтән башлап, театр каршындагы мәйданда халык өчен бәйрәм «уйналачак». Кызык булыр ул җитәкләшеп, кулга кул тотынышып дигәнем, Камал театрын кочаклау.
Традициянең икенчесе – бөек режиссер
Марсель Сәлимҗанов туган көнне театр сәхнәсендә премьера уналу кадәресе дә сакланачак. Ул
Зөлфәт Хәким әсәре буенча
Илгиз Зәйниев куйган
«Бармы ришвәткә дәва?» спектакле булачак.
Яңа сезон турында җәелеп сөйләрдән элек театрның 110 еллык юбилеен кибәнләп куярга кирәк. Тантана декабрь азагында булыр дип көтелә. Йомгаклап куясы нәрсә тагын да бар. Анысы – «Яңа татар пьесасы»н быел соңгы мәртәбә уздырып, алга таба өметле авторлар белән индивидуаль тәртиптә эшләргә ниятлиләр.
Тагын бер хәбәр:
«Үлеп яратты», «Минем исемем Кызыл», «Мәхәббәт турында сөйләшик» спектакльләре репертуардан алына. Кайсына тамашачы йөрми, кайсы «картайган». Дөресрәге, яңа спектакльләргә урын кирәк. Яңалар исә
«Ак калфагым төшердем кулдан» (Илдар Юзеев, Фәрит Бикчәнтәев),
«Җилкәнсезләр» (Кәрим Тинчурин, Георгий Цхвирава) спектакльләре.
Камал театры җитәкчелеге Саха акдемия театрының өч спектакль белән үзләренә килүен вакыйга итеп бәяли. Сахалар татар театры белән бертигез 110 еллыкларын билгеләп йөриләр икән. Саха-якут театры Казакъстан, Санкт-Петербург, Мәскәү гастроль маршрутына Казанны да керткәнгә директор
Илфир Якуповның да күңеле булган. Бу театрга игътибар 2017 елның июнь башында узачак
«Нәүрүз» фестивалендә дә үзәктә булачак, ягъни алдагы фестиваль аларга багышланачак.
Алдагы гастрольләрме? Гыйнвар аенда, гадәттәгечә, Мәскәү. Малый театр белән алмаш тәртибендә йөрешү бу, димәк, гыйнварда алар безгә килеп уйнаячак. Ә менә Туймазы театры үзе Казанга килгәләп торса да, Камалларның анда ук барып җиткәннәре булмаган. Быел менә – февраль аенда Чаллы, Түбән Кама шәһәрләрендә йөреп кайтканнан соң, апрель җиткәч, баралар.
Театрның баш режиссеры әле үзе Уфада, Гафури исемендәге башкорт дәүләт акдемия театрында француз драматургы Дж. Ануй әсәре буенча «Антигона» дигән спектакль кую белән мәшгуль икән. Греция, антик чор тематикасы Гафури театры өчен аерым бер әһәмияткә ия икән, чөнки бу театр ачылганда – 1919 елда Мортазин-Иманский куйган беренче әсәр – «Эдип патша» да антик чордан. Бу хәбәрне безгә матбугат конференциясендә онлайн режимда катнашкан Фәрит Бикчәнтәев җиткерде.
Асия Юнысова,
Комментарий юк