24 ноябрь көнне коррупциягә карата дәүләт хакимият органнары һәм гражданлык җәмгыяте институтлары бердәмлеге турындагы мәсьәләгә багышланган матбугат конференциясе булып узды. Журналистлар белән очрашуга килгән Татарстан Респрубликасы Идарәсенең коррупциягә каршы мәсьәләләр буенча оештыру бүлеге мөдире Алексей Панкратов, Татарстан Иҗтимагый палатасының гражданлык җәмгыяте институтларын үстерү мәсьәләләре буенча комиссия рәисе Кирилл Пономарев, Татарстан Республикасы Мәгариф һәм фән министры урынбасары Тимерхан Алишев, «Татарстан Республикасы иҗади яшьләр академиясе» иҗтимагый оешмасы президенты Валентин Шихобалов һәркайсыбызны кызыксындырган дистәләгән сорауларга җавап бирделәр.
Алексей Панкратов: «Безнең төп бурыч – коррупциягә каршы көрәшкә бөтен халыкны тарту, гражданнар арасында фикер формалаштыру».
Кирилл Пономарев: «Иҗтимагый палата мондый җитди проблемадан читтә кала алмый. Шуңа без коррупциягә каршы комиссия оештырырга булдык та».
Тимерхан Алишев: «Мәктәпләрдә балаларга коррупциягә каршы белем бирү максатында шундый юнәлештә 4 укыту-методик пособиесе эшләнде һәм файдалануга тапшырылды».
Валентин Шихобалов: «Безнең оешмада 18 яшьтән 30 яшькәчә булган егет һәм кызлар. Алар белән коррупция, ширвәтчелек очракларына каршы төрле үткәрелә».
Коррупция темасының мәктәп балалары арасына да үтеп керүен ишеткәч, сөенеп куйдым. Аның ни икәнен белергә, кечкенәдән үк нәфрәтләне үсәргә тиеш. Укысыннар, әйдә! Ичмасам, алар ширвәт бирмәскә, ширвәт алмаска өйрәнер.
«Сөембикә» журналы журналистының: «Укучыларга коррупциягә каршы тәрбия бирү бик яхшы. Укытучыларга да акцент ясалачак, дидегез. Мәктәп директорларына, балалар бакчалары мөдирләренә дә шундый ук зур акцент ясарга, аларны да парта арасына утыртып аңлатмырга, коррупциянең нигә китерәчәген күз алдында ярылып яткан фактлар белән күрсәтергә җыенмыйсызмы? Электрон чиратлар сакланмый, баланы без элиталы дип атаган яхшырак мәктәпләргә бирү өчен дә, бакчага урнаштыру өчен дә кесәләренә акча салырга кирәк» дигән соравына министр урынбасары бу юнәлештә эшләрнең, «Халык контроле» белән берлектә инде күптәннән баруын, шундый фактлар ачыкланганда, закон бозучы җитәкчеләрнең җаваплылыкка тартылуын конкрет мисаллар белән аңлатып бирде. Быел ата-аналардан 6 меңгә якын мөрәҗәгать алынган. Шуның 248 е – коррупцион характерда.
Мәдинә Афзалова,
Комментарий юк