​Татарстанда «Ефәк юлы» раллиенда катнашучыларны чәк-чәк белән каршы алдылар

Татарстан чиген беренче булып Франция вәкиләре узды. Яшел Үзән районында аларнымилли киемдәге кызлар һәм ММЧ вәкилләре  коеп яуган яңгыр астында каршы алды. Узышчылар беренче тапкыр чәк-чәктән авыз итте. Аннары алар кызлар һәм башка каршы алучылар белән фотосурәткә төште.

Раллида катнашучылар Яшел Үзәннән Kazan-Arenaга юл ала. Аннары «Казан» Гаилә үзәге белән «Татнефть-Арена» арасынданы тантаналы старт урынына китә. Ярышлар 19.00дән 22.00гә кадәр узар дип көтелә.

Искәртеп узабыз: «Ефәк юлы» халыкара ралли-рейды тантаналы төстә кичә Мәскәүнең Кызыл мәйданында башланды. Анда Татарстан Президенты Рөстәм Миңнеханов та катнашты. Республика лидеры бу иң катлаулы һәм мавыктыргыч узыш булыр дигән ышаныч белдерде.

Быел ике атна ярым вакыт эчендә раллида катнашучыларга Россия, Казакъстан һәм Кытай чикләрен узып, 10 мең 780 чакрым юл узарга туры киләчәк. Анда барлыгы 27 йөк машинасы һәм 110 внедорожник катнаша. Ралли-рейд катнашучылары арасында Чаллының «КАМАЗ-Мастер» командасыннан алты экипаж да бар. Ралли 24 июль көнне Пекинның үзәк мәйданы - Тяньаньмэньда тәмамлана.

http://tat.tatar-inform.ru/