Татарстан турында фильм төшерүдә һәркем катнаша

Фильмны Казанның яшь һәм талантлы режиссеры Владислав Кушнеров төшерә. Татарстан турындагы фильм – “Кинокрут” видеостудиясе һәм Вконтакте социаль челтәренең «Татарстан. Наша Республика» паблигының уртак проекты.

Бүген кинокартинаның беренче эпизодлары Саескан Тавында төшерелә башлады. Бу аңлашыла да: нәкъ менә ул маршрутның беренче ноктасы булып тора. Фильмны биш көн эчендә төшереп бетерергә җыеналар. Шул сәбәпле, кыска гына вакыт эчендә Татарстанның 16 торак пунктына сәяхәт кылачаклар. Аларда төшерелгән эпизодлар аша республикабызның бөтен матурлыгын күрсәтәчәкләр.

Идея авторлары Татарстанда яшәүче һәр кешегә фильм иҗат итүче булу мөмкинлеген бирә. Республика турында кызыклы видеокадрлары булган һәркем аларны фильм режиссерына, паблик администраторына җибәрә яки #НашаРеспублика дигән хештэг ярдәмендә Вконтакте социаль челтәренә урнаштыра ала. Кадрлар профессиональ камерага гына түгел, һәвәскәр техникага, хәтта смартфонга да төшерелгән булырга мөмкин.

- Безнең Татарстан – гаҗәеп төбәк. Республиканың бөтен районнарында да матур урыннар бар, җирлегебз уникаль тарих һәм кешеләре белән аерылып тора... Алар турында сөйләргә генә кирәк. Без, үз чиратыбызда, искиткеч гүзәл республикабызның бар матурлыгын ача торган масштаблы фильм төшерергә уйлыйбыз, – дип сөйли фильм режиссеры Владислав Кушнеров.

Фильмның ничек төшерелгәнен Вконтакте социаль челтәрендә күзәтеп барырга мөмкин. Төшерү барышындагы фотоларны даими рәвештә  урнаштырып баралар.

сылтама: http://intertat.ru/tt/society-tt/item/47068-tatarstan-turyinda-film-t%D3%A9sher%D2%AFd%D3%99-%D2%BB%D3%99rkem-katnasha.html