Татар шәмаилләрендә – изге урыннар

9 сентябрь көнне эшли башлаячак күргәзмәдә ХХ гасыр башында нәшер ителгән басма шәмаилләр репродукцияләре урын ала. Мәрҗәни фонды коллекциясен тәшкил иткән тупланмада егермеләп татар басма шәмаилләрен күрергә мөмкин. Аларда хаҗ объектлары һәм мөселманнарның архитектура корылмалары сурәтләткән.

Репродукцияләрдә Мәккә шәһәре күренешләре: Кәгъбатулла, Гарәфәт тавы, Мина үзәне, Мәдинәдәге мәчет, Истамбулның иман йортлары, Казанның Сөембикә манарасы, Болгардагы изге урыннар тасвирланган.

ХХ гасыр башында Казан – Россия мөселманнары даирәсендә аерым урын биләп торган. Биредә дини матбугат, шул исәптән шәмаилләр бастыру эше җайга салынган. Диндәге яңалыклар, реформалар бөтен Россиягә биредән таралган. Шуңа күрә дә мөселманнар өчен изге урыннар белән беррәттән күргәзмәдә  Казанның һәм Болгарның архитектура һәйкәлләре күренешләрен дә күрергә мөмкин.  Белгечләр раславынча, бүгенге көндә дә басма шәмаилләребез үзенең аңлату-мәгълүмат бирү функциясен югалтмаган.

Һәр шәмаилгә аңлатма бирелә. Бу алым киң катлам вәкилләренә теге яки бу экспонатны аңлаешлы итеп күрсәтергә мөмкинлек бирә. Гарәп телен белмәгәннәр дә экспонатларда нәрсә язылганы турында мәгълүмат ала. Проект авторлары ышандырганча, экспозиция шәрык белгечләренә генә түгел, гади кешеләргә дә кызыклы булачак. Күңел калебе, иман төшенчәләре турында фикер йөртәсегез килсә, күргәзмә белән танышмый калмагыз!

чыганак - http://intertat.ru/tt/