Бүген Татарстан һәм Россия тормышы турында оператив мәгълүмат бирүче абруйлы һәм профессиональ чыганакларның берсе “Татар-информ” мәгълүмат агентлыгы 25 еллыгын билгеләп үтә.
Бүген, шулай ук, танылган журналист Леонид Толчинскийның агентлык белән җитәкчелек итә башлавына да нәкъ 10 ел тула. Агентлык КПСС Татар өлкә комитеты бюросы карары белән, 1990 нчы елның 6 нчы июнендә оешкан. Документ астында үз имзасын КПСС өлкә комитеты секретаре Минтимер Шәймиев куйган.
“Татар-информ” МА юбилеен ике этапта билгеләп узачак. Искәртеп узыйк, элегрәк Татарстан журналистлары өчен “ГТО-шоу” оештырылган иде, ул ГТО нормаларын бирү декадасы кысаларында һәм “Татар-информ”ның 25 еллыгы хөрмәтенә узды.
Беренче этапта республика ММЧларының 40 ка якын вәкиле катнашты. “ГТО-шоу”ның икенче этабы июнь аенда “Свияга” стендка ату комплексында үтәчәк. 16 нчы июньдә “Татар-информ” агентлыгының 25 еллыгы хөрмәтенә Казанда тантаналы кичке аш узачак.
“Татар-информ” МА – әйдәп баручы мәгълүмат агентлыгы, 25 ел эчендә Татарстан һәм Идел буеның эре гаммәви мәгълүмат чарасы буларак абруй казанган. Колоссаль эш тәҗрибәсе, журналистларның профессиональлеге, Калининградтан алып Владивостокка кадәр шәхси корреспондентлар челтәре – болар барысы да “Татар-информ” МАна Татарстан, Россия һәм дөнья турында иң тулы һәм хакыйкый мәгълүмат чыганагы буларак ышанган киңкүләм аудитория яуларга мөмкинлек бирде. Көн саен, тәүлегенә 24 сәгать, “Татар-информ” рус телендә 250, татар телендә 40 ка кадәр оригиналь (рус телендәге версияне кабатламаган үз мәгълүматы, шул исәптән Ерак чит илләрдә яшәүче татарлар өчен латиницада) һәм инглиз телендә 25-30 яңалык урнаштыра.
Ай дәвамында, тулаем алганда, агентлыкның 1 млн га якын язмасы укыла. “Татар-информ” базасында ТРда тиңдәше булмаган заманча җиһазландырылган һәм пресса өчен чаралар уздыру өчен иң зур ихтыяҗ булган матбугат үзәге булдырылган.
Максим Зарецкийның “Берега, берега”, Михаил Капланның “Казан” һәм “Иннополис. Хыялдагы шәһәр” махсус проектлары республика өчен генә түгел, ил өчен дә уникаль медиапродуктлар булып санала.
2015 нче елда, шулай ук, социаль челтәрләрнең яңалыклар тасмасы булган уникаль “Социаль хаб” проекты гамәлгә кертелде.
Сылтама:
http://tat.tatar-inform.ru/news/2015/06/06/110177/
Комментарий юк