«Шатлык»та Каз өмәсе

20 ноябрьдә Арчадагы «Шатлык» балалар бакчасында әни- әбиләр һәм балалар бакчасында эшләүчеләр Сөембикә» журналы зезмәткәре һәм шагыйрә Асия Юнысова белән очраштылар. Арча районында хатын-кызлар «Сөембикә» журналын яратып укыйлар. Шуңа күрә аларның журналистка сораулары да бик күп булып чыкты.Дөньядагы хәлләр, милләт, мәктәпләр, тел язмышы аеруча борчый икән аларны. Күптән түгел генә ачылган балалар бакчасы яшҗәниләр өчен дә, тәҗрибәле дәү әниләр өчен дә күңелдәге уйларны уртаклашу урынына әйләнгән. «Шатлык» бакчасы үзе исә фәкать соклану, балалар өчен сөенү предметына әйләнгән. Район үзәгендә яшәгән балалар авыл балысыннан да, шәһәр баласыннан да бәхетлерәк диләр алар. Чөнки бу бакчадагы рәхәтлекләр авылда юк. Ә шәһәрдә, булса да, төрле түгәрәкләргә йөртү өчен юл йөрү мәшәкате зур яисә вакыт җитми. Ә биредә сабый бала берьюлы өч тел өйрәнә, рәсем, музыка, спорт белән шөгыльләнә ала. Логопед ярдәме күрә. Яшәү шартлары хакында әйтеп торасы да юк. Бакчадагы 68 тәрбияченең 35 е югары белемле булу да күп нәрсә хакында сөйли.

Рус һәм татар төркемнәренә йөргән балаларның ике телдә дә шигырь укый, җырлар җырлый белүләрен шагыйрә апалары да бик яратты. Ул аларга яңа гына чыккан «Алкалы чәчәкләр» китабыннан шигырьләр укыды. Аннары соңыннан иркенләп укысыннар өчен китабын бүләк итте. Өлкән төркем сабыйлары «Каз канаты» көенә биеделәр. Әлбәттә, кулларында каз канатлары иде. Нәниләрнең татар халык йолаларын белеп үсүләре бу бакчада тәрбия нигезендә ята икән.