Рөстәм Миңнеханов һәм Виктор Садовничий Татарстан белән М.В.Ломоносов исемендәге МДУ арасында хезмәттәшлек турында килешү имзалады

Документ кысаларында Татарстан үзенең фәнни һәм инновацион мәйданчыкларын инновацион тикшеренүләр уздыру өчен бирергә әзер

Бүген Мәскәүгә эш сәфәре кысаларында Татарстан Республикасы Президенты Рөстәм Миңнеханов М.В.Ломоносов исемендәге Мәскәү дәүләт университетында (МДУ) булды, анда ул әлеге уку йорты ректоры Виктор Садовничий белән очрашты.

Аннары Рөстәм Миңнеханов белән Виктор Садовничий МДУ составындагы институтларны һәм биналарны, медицина үзәген һәм башка объектларны йөреп чыкты. Югары уку йорты буенча экскурсия МДУның игенчелек музееннан башланды. Аннары Рөстәм Миңнехановка университетның медицина үзәген күрсәттеләр. Кунаклар университет клиникасы эшчәнлеге белән танышты: анда студентларга һәм мөгаллимнәргә тулысынча медицина хезмәтләре күрсәтелә.    

Татарстан Президенты шулай ук МДУ Тарих музеенда да булды, анда Шәрәфле кунаклар кенәгәсендә истәлеккә язма калдырды.  Шуннан соң Рөстәм Миңнеханов студентлар һәм профессор-педагоглар белән очрашты.

Очрашуда катнашучылар алдында чыгышында Виктор Садовничий искәрткәнчә, бу уку йортын шагыйрь Муса Җәлил дә тәмамлаган.

Виктор Садовничий Татарстан Президенты Рөстәм Миңнехановка Мәскәү университеты шәрәфле профессоры исеме бирелү турында раслама тапшырды.

Үз чиратында, Рөстәм Миңнеханов мактаулы исем өчен рәхмәт белдерде һәм МДУны илебез мәгарифенең һәм фәненең уникаль үзәге дип тануны бик дөрес дип санавын әйтте. «Югары уку йорты биргән белемнәр – бу һөнәри осталык таныкламасы һәм гарантиясе», - диде ул.  

«Белем бирү, фәнни һәм инновацион куәт-мөмкинлекләребезне киләчәктә дә җайга салу һәм нәтиҗәле файдалану өчен без бүген МДУ белән килешү имзаларга җыенабыз, – диде Рөстәм Миңнеханов. – Бу документ стратегик партнерлыкның һәм уртак эшчәнлекнең төп юнәлешләрен билгеләячәк. Безнең хезмәттәшлек озак һәм уңышлы булачагына ышанам».

Соңыннан Татарстан Республикасы белән М.В. Ломоносов исемендәге Мәскәү дәүләт университеты» югары белем бирүнең ФДБМУ арасында хезмәттәшлек турында килешү имзаланды.

Документка Татарстан Республикасы Президенты Рөстәм Миңнеханов һәм МДУ ректоры Виктор Садовничий кул куйды.

Документ кысаларында инновацион тикшеренүләр уздыру өчен Татарстан үзенең фәнни һәм инновацион мәйданчыкларын бирергә әзер. Килешү  5 елга исәпләнгән, дип хәбәр итә ТР Президенты матбугат хезмәте.    

сылтама: http://tatar-inform.ru