​Рөстәм Миңнеханов «Ефәк юлы» раллиен ачу тантанасында катнашты

 

 
Стартка кадәр Рөстәм Миңнеханов ябык парктагы автомобильләрне карап чыкты, истәлеккә фотога төшерде. Журналистлар сорауларына җавап биреп, Татарстан Президенты искәрткәнчә, бүген «КАМАЗ»лар – илебезнең  база  автомобильләре. «КАМАЗ Мастер» командасының спорттагы җиңүләре – безнең горурлыгыбыз», - диде Рөстәм Миңнеханов. Ул «Ефәк юлы» маршруты турында билгеләп үткәнчә, бу – Россия, Казахстан һәм Кытай территорияләре аша узучы бай һәм катлаулы трасса, мөгаен, дөньяда башка аңа тиңнәр юктыр. «Мин бу иң катлаулы һәм иң кызыклы ярыш булачагына ышанам», - диде Рөстәм Миңнеханов.
 
«Ефәк юлында» пилотлар Эдуард Николаев, Айрат Мәрдиев, Антон Шибалов, Андрей Каргинов, Дмитрий Сотников җитәкчелегендәге «КАМАЗ-Мастер» командасының, шулай ук Хоу Хоньи җитәкчелегендәгн Кытай-Россия экипажлары катнашачак. «Ефәк юлы» раллие «КАМАЗ» яңа капотлы йөк автомобиле өчен соңгы сынау булачак.
 

 
Раллиның беренче этабы – Мәскәү белән Казан арасы, аннары маршрут Уфа аша уза, ә 11 июльдә анда катнашучылар Казахстанның Костанай шәһәренә барып җитәчәкләр. Казахстан территориясендә алар Астана, Балхаш һәм Алма-Аты шәһәрләре аша барачак, шунда 15 июль көнне ялга туктаячаклар. 16 июльдә ралли Кытай территориясендәге Боро-Талада булачак, һәм бер атна эчендә көнчыгышка таба – Эчке Монголиядәге Гоби һәм Алашань чүлләре аша узачак. Раллиның иң озын этабын – сигезенчесен анда катнашучылар 17 июльдә Кыйтай төньягы буйлап Боро-Таладан алып Урымчыга кадәр 905 км узачак.
 
Ралли, Россия, Казахстан һәм Кытай территорияләре аша узып, 24 июль көнне Пекинның Тяньаньмэнь мәйданында тәмамланачак. Катнашучылар 10 мең километран артык юл узачак – өч илнең 15 шәһәре аша. Җиңү өчен барлыгы 110 юлсыз җирдә йөри алучы автомобиле һәм 27 йөк автомобиле көрәшәчәк, шулардан - «КАМАЗ» күренекле йөк автомобильләре, шулай ук  бөтендөнья раллие легендалары – Стефан Петерансельнең, Себастьян Лебның, Сириль Депреның джиплары. Гомуми маршрут 10 774 км, шулардан 4100 км махсус участоклар.

http://intertat.ru/