Милли китапханәгә – 150 ел

14-16 октябрьдә Казанда «Милли китапханәләр: үткәне һәм бүгенгесе» дигән халыкара фәнни-гамәли конференция үтә. Әлеге чара Татарстан Милли китапханәнең 150 еллыгы уңаеннан оештырылды.

Россия һәм чит илләр милли китапханәләре үсешенең хәзерге тенденцияләре, профессиональ мәгълүмат алмашу, китапханәләр һәм төрле мәдәни институтларның үзара бәйләнеше һәм хезмәттәшлеге, бүгенге китапханәләрнең социомәдәни шартлардагы төп бурычлары – конференция эшчәнлегенең төп юнәлешләре шулар. Бүген милли китапханәләр ничек яши, хәзерге җәмгыятьнең таләпләренә ни дәрәҗәдә җавап бирә – өч көн дәвамында бу сорауларга да җавап эзләнәчәк.

Конференциянең пленар утырышы юбилей уңаеннан махсус эшләнгән фильмнан өзекләр тәкъдим итүдән башланды. Аннары музей хезмәткәрләренә дәүләт бүләкләре тапшырылды. Утырышка килүчеләр китап күргәзмәсе белән дә таныша алды. 150 еллык тарихны чагылдырган әдәби мирас арасында Второв һәм Сахаров, Максудиларның китаплары, кулъязма әсәрләре дә урын алган иде.

Конфенция эшендә Россия китапханәләренең мәшһүр белгечләре, Төркия, Германия, Казахстан, Үзбәкстан, Халыкара төрки мәдәният оешмасына караган илләр китапханәләреннән вәкилләр, шулай ук Россиянең белем бирүче һәм фәнни оешмаларының галимнәре һәм фәнни хезмәткәрләре катнаша. Төп докладчылар буларак Россия дәүләт, Россия милли, Төркия Милли, Казахстан Милли китапханәләренең халыкара дәрәҗәдәге хезмәткәрләре, Татарстан Республикасы җәмәгать эшлеклеләре катнаша.

Конференция эшли торган төп мәйдан – «Корстон-Казан» үзәге. Биредә 14 октябрьдә пленар һәм секцияләр утырышлары, «түгәрәк өстәлләр» янында сөйләшүләр үтте.

15 октябрьдә Татарстан Республикасы Милли китапханәсенең Зур уку залында Россия һәм чит илләр китапханәләре вәкилләре катнашында «Мәдәниятара мөнәсәбәтләрдә китапханәләрнең катнашуы» дигән очрашу-әңгәмә узачак. Мюнстер шәһәре китапханәсе директоры Беате Трёгер (Beate Tröger) «Төньяк Рейн–Вестфалия Федераль җирлеге китапханәсендә мәдәни мирасны саклау, аның торышы һәм цифрлаштырып файдалану» дигән доклад белән чыгыш ясый.

Конференция кунакларының мәдәни программасы кысаларында Казан (Идел буе) федераль университеты тарихы музее һәм Н.И. Лобачевский исемендәге Фәнни китапханәсе белән танышу, Казан буйлап экскурсия, «Казан Кремле» музей-тыюлыгында булу һәм шәһәрнең төп театрларында спектакльләр карау ниятләнә. 16 октябрьдә исә, конференциядә катнашучыларның теләкләренә карап, Борынгы Болгарга, Зөя утрау-шәһәрчегенә, Раифа монастырена, Г.Тукайның Кырлайдагы әдәби-мемориаль музеена экскурсияләр оештырыла.

 

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
Реклама
Соңгы комментарийлар
Реклама
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан