«Мәдәниятләр мозаикасы» фестиваленең урыны тәгаенләнде

29 август көнне Казанда «Мәдәниятләр мозаикасы» дип аталган беренче республика этноконфессиональ фестиваль үткәрелә. Республика көненә багышланган әлеге чара Татарстандагы милләтләрнең, диннәрнең төрлелеге белән таныштыра.
Бу чараны Татарстанның Мәдәният министрлыгы, Казанның Башкарма комитеты, Татарстан халыклары ассамблеясы, Рус православ чиркәвенең Татарстан митрополиясе, Татарстан мөселманнарының Үзәк диния назәрәте, Казандагы яһүдләр дини оешмасы, Казан шәһәренең Рим-католик чиркәве оештыра.

- Әлеге проект быел беренче тапкыр тормышка ашырыла. Аның идеясе Идел буе федераль округының этноконфессиональ сәясәт мәсьәләләре киңәшмәсендә яңгыраган иде. Әлбәттә, безнең республикада төрле милләтләрнең бәйрәмнәрен үткәрү традициясе бар. Ләкин шушы фестиваль барлык диннәрне, милләтләрне дә берләштерүче чара булып тора. Диннәребез төрле булса да, безнең кыйммәтләребез бердәм. Безнең көчебез – мәдәниятләрнең төрлелегендә, – дип белдерде журналистларга Татарстан мәдәният министрының беренче урынбасары Ирада Әюпова.

Чара Кремль яр буенда, төгәлрәк әйтсәк, Ленин дамбасы белән «Казан» милли-мәдәни үзәге арасындагы мәйданда узачак.  Урам форматындагы әлеге фестиваль көндезге 12дән кичке 6га кадәр дәвам итәчәк. Керү – ирекле.

«Мәдәниятләр мозаикасы» фестивале исә ике төп юнәлешкә бүленгән. Аның беренчесе күргәзмәләргә багышланган. «Мәдәниятнең бер өлеше буларак дин» күргәзмәсе, Болгар һәм Зөя шәһәрләренең фотокүргәзмәсе, каллиграфия, чүкү сәнгате буенча мастер-класслар оештырыла.

Фестивальнең икенче төп юнәлеше – концерт. Анда фольклор әсәрләр белән беррәттән дини әсәрләр дә башкарылачак. Яшьләрнең үз тамырларын онытмавы да мөһим фактор булып тора. Шул сәбәпле, яшьләр милли көйләрне  заманча итеп башкарырга җыена. Моннан тыш, «Мәдәният мозаикасы»нда республикадагы 35 милли-мәдәни берләшмәнең 20се катнашачак.

Татарстан мөселманнарының Үзәк диния нәзарәте рәисе, мөфтинең беренче урынбасары Рөстәм хәзрәт Батыр әйтүенчә, бу фестиваль милләтләр, диннәр арасындагы без горурланып сөйли торган мөнәсәбәтләрнең көзгесе булып тора. Мөселманнар җәмгыяте «Мәдәниятләр мозаикасы»нда эксклюзив әсбаплар тәкъдим итәргә җыена. Коръән китапларының төрле басмалары белән беррәттән, анда мәдрәсәләр өчен язылган өр-яңа уку пособиеләре тәкъдим ителәчәк. Шулай ук татар шамаилләре күргәзмәсе оештырылачак. Араларында гадәти шамаилләр белән бергә Татарстан мәчетләре сурәтләнгәннәре дә булачак.

Православ дине вәкилләренә фестивальдә китаплар, чиркәү кирәк-яраклары тәкъдим ителәчәк. Моннан тыш, православ иконаларны реставрацияләү буенча мастер-класс оештырыла. Протоиерей Владимир белдергәнчә, концертта Богородица монастыренең Архиерея, Казан духовный семинариясе хорлары катнаша. «Мәдәниятләр мозаикасы – ул мәдәниятләрне саклап калу. Ә мәдәни мохитне саклау әйләнә-тирәне саклау кебек үтә дә мөһим мәсьәлә», – диде рухани.

Фестивальдә Казанның Рим-каталик чиркәве хоры да катнашыр, дип көтелә. Әйтергә кирәк, бу хорда төрле милләттәге, төрле диндәге кешеләр чыгыш ясый.

Әлбәттә, милләтләр дигәч, аларның милли аш-сулары да күз алдына килә. Тик, ни кызганыч, быел кунакларны үзбәк пылавы, грузин хинкалисы кебек ризыклардан авыз иттереп булмаячак. Милли аш-су бары тик милли-мәдәни автономияләрнең павильоннарында гына күрсәтелә икән.

Әлеге чарада 5-7 мең кеше катнашыр, дип белдерә оештыручылар. Гомумән алганда, этноконфессиональ фестиваль ел саен уздырылып, 2-3 көнлек масштаблы чарага әверелер, дип ниятлиләр. «Мәдәниятләр мозаикасы» беренче республика этноконфессиональ фестивале Татарстандагы барлык милләт, диннәрне берләштергән беренче чара булыр, дип уйлыйлар.

сылтама: http://intertat.ru/tt/madaniyat-tt/item/47934-%E2%80%9Cm%D3%99d%D3%99niyatl%D3%99r-mozaikasyi%E2%80%9D-festivalene%D2%A3-uryinyi-t%D3%99gaenl%D3%99nde.html
 

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • Гафу итә алмыйм сине, әни! – Апа, әни акылдан шашкан! Көзнең яңгырлы салкын бер көне иде ул. Мәктәптән туңып кайтып кына кердем, каршыма башлангыч сыйныфта укучы сеңлем Айзилә йөгереп килеп чыкты да, колагыма әнә шулай дип пышылдады.
    14786
    3
    177
  • Әллә?! Завод капкасы төбендә сезне бер карчык көтә дигән хәбәрне ишетүгә, Фәрһадның йөрәге чәнчеп алды, зиһене чуалды, күз аллары караңгыланды.
    11682
    2
    121
  • Балагызны үзем карап торам! - 1 Кызлары туганнан бирле Аида белән Тимурның иртәсе гел бертөрле башлана хәзер. Тимур иң беренче булып уяна да, нәни кызы белән төне буе бала караваты яныннан китмәгән хатынын уятмаска тырышып, аш бүлмәсенә чыга. Иртәнге ашны ашагач, кереп битләреннән генә пәп итеп ала да эшкә китә.  Подъез ишегеннән чыгуга телефоны пипылдаганына да ияләште ир. Ул беренче  катка төшеп җиткәнче, хатыныннан уңышлы көннәр теләп смс килеп җитә. Ә ул телефонын алып «Рәхмәт!» яза. Бүгенге иртә дә нәкъ шулай башланды.
    4742
    7
    86
  • Гафу итә алмыйм сине, әни! 2 Шулай да ул ЗАГСка килгән иде. Без машинадан төшүгә яныма килде. – Син ... монда? – гаҗәпләнүемне яшерергә дә теләмәдем.
    5348
    4
    77
  • Картаясың барын онытма! Килен кыз булмый. Бу әйтемне барыгызның да ишеткәне бардыр, мөгаен. Дөрес әйтә халык, берәү дә киленен дә, киявен дә үз баласы кебек ярата алмый. Кайнана белән кайната да үз әти-әниең кебек үк түгел, билгеле. Ләкин яратуга алмашка хөрмәт дигән хис тә бар бит әле.
    5979
    0
    56
Реклама
Реклама
Соңгы комментарийлар
Реклама
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан
«Объективта – әни»
Кешелек хакында фәлсәфи уйланулар, робот София һәм ипи
Балачак – уйнар чак...