5-10 август көннәрендә Татарстан башкаласында FICTSChallenge Спорт киносы һәм телевидениесе XXXIII чемпионатының финалы узачак. Казанда 5 көн эчендә 100 фильм күрсәтәчәкләр. «3D Port Cinema» кинотеатрында тәкъдим ителәчәк кинофильмнарны карау – бушлай.
Шунысын билгеләп узарга кирәк: конкурс программасында спорт төрләренә багышланга уен, документаль һәм анимацион картиналар бар. «Приключения маленьких итальянцев» Россия-Италия фильмындагы төп геройлар – Альпы таулары янындагы шәһәрдә яшәүче яшүсмерләр. Алар хоккей һәм фигуралы тимераякта шуу белән шөгыльләнә.
Италиянең “Опера на льду” кинокартинасында танылган фигуралы шуучылар Каролина Костнер, Татьяна Тотьмянина, Максим Маринин, Стефан Ламбьель катнашкан. Ә «Пара номер один. Больше чем любовь» фильмы Россиянең фигуралы шуучылары Татьяна Волосожар и Максим Траньковка багышланган. «Хоккейные игры» картинасы (Россия) совет хоккеен дөнья дәрәҗәсенә чыгарган хоккей тренерлары Анатолий Тарасов һәм Всеволод Бобровның мөнәсәбәтләре һәм күп еллар дәвамында булган каршылыгы турында бәян итә. «Мы будем чемпионами мира» (Сербия) исә Югославия баскетболчылары хакында.
Фестиваль программасындагы кайбер фильмнар Россиядә әле беренче тапкыр гына тәкъдим ителәчәк. Алар арасында «Мы будем чемпионами мира» (Сербия), Пьетро Меннеа: стрела юга» (Италия), «Выходя из тени тренера Эрикссона» (Швеция), «За гранью» (Непал), «Тойни: от ссылки к олимпийскому триумфу» (Швеция) дигән фильмнар бар.
FICTSChallenge Спорт киносы һәм телевидениесе XXXIII чемпионатының финалында Россия 25 фильм тәкъдим итәчәк. Аларның алтысы Татарстанда төшерелгән. Кинофестиваль дәвамында Татарстанда туган боксчы Эльмира Азизовага багышланган Фәрит Дәүләтшинның «Леди Хук» кыска метражлы фильмы тәкъдим ителәчәк.
«Настоящий Карадениз» исемле кыскаметражлы фильм, исеменнән үк аңлашылганча, “Рубин” футбол командасының ярымсакчысы турында. Спорт роликлары номинацияләрендә «Леночка, Наташа, Ильдарчик: с заботой о каждом болельщике» һәм «От ФК «Рубин» с любовью» кебек безнең республикада төшерелгәннәре дә бар. “Спорт мультипликациясе” номинациясендә «Татармультфильм» җитештергән «Кто самый сильный» и «Гусёнок и Лебедёнок» дигән мультфильмнар катнаша.
Спорт киносы һәм телевидениесе халыкара чемпионатында конкурска килгән эшләр 8 номинациядә бәяләнәчәк. Алар арасында “Олимпия уеннары – Олимпия рухы”, “Документалистика”, “Спорт трансляцияләре”, “Кино һәм футбол”, “Кыска метражлы фильмнары” һәм “Спорт мультипликациясе” дигәннәре бар. Конкурс оештыручылары “Балалар мультипликациясе” дигән өстәмә номинацияне булдырган.
Кинокартиналарга мәдәният, медиасфера һәм спорт өлкәсенең танылган шәхесләре бәя бирәчәк. Ә халыкара чемпионатның жюри рәисе – кинорежиссер, сценарий язучы һәм продюсер Георгий Шенгелия.
сылтама:
http://intertat.ru/tt/society-tt/item/47063-kazanda-tagyin-ber-chempionat-bashlana.html
Комментарий юк