Казанда информатика буенча (IOI) XXVIII Халыкара олимпиада узачак

Мондый олимпиадалар ЮНЕСКО инициативасы белән 1989 елдан бирле үткәрелә. 2015 елны ул Казахстанда үткәрелгән. Казанда ( безнең илдә) аның беренче мәртәбә үтүе. 2017 елда ул Иранда үткәреләчәк. Олимпиадада 84 илдән 324 укучы катнашачак. Бу – моңарчы уздырылган олимпиадалар белән чагыштырганда, иң зурысы. Аның беренчесендә нибары 13 ил катнашкан.
    Журналистлар белән очрашуга килгән Татарстан Республикасы Мәгариф һәм фән министрының беренче урынбасары Андрей Поминов, КФУның гомуми һәм педагогик белемнәр буенча ректор киңәшчесе Людмила Ногуманова, «Татарстан Республикасының мәгълүмати технология үзәге» башкарма директоры Светлана Камалетдинова халыкара олимпиаданың кайда узачагы, нинди илләр катнашачагы, шартлары турында сөйләделәр. 
    «Россиядән ике команда – сигез кеше катнашачак. Команда составында КФУның Лобачевский исемендәге лицее укучысы Әсхәт Сәхәбиев та бар», – диде Людмила Нагуманова.
     Дөньякүләм дәрәҗәдәге әлеге чара Универсиада авылында узачак. Кунаклар өчен төрле күңел ачу программалары каралган. Ашату- эчертү мәсьәләсе дә алдан ук уйланып куелган. Чөнки олимпиадада катнашучылар арасында хәләл ризык кына ашаучылар да, итле ризыктан, гомумән, баш тартучылар да бар.
    Оештыручылар: Казан федераль университеты, РФ Элемтә һәм массакүләм коммуникация чаралары министрлыгы, РФ Мәгариф һәм фән министрлыгы, Татарстан Республикасы Мәгариф һәм фән министрлыгы. Олимпиаданы 12 кешедән торган Халыкара комитет җитәкли. Шунысын да әйтик, ул көннәрдә инглиз телен белүче 200 волонтер эшләячәк.