Спортның су төрләре буенча ФИНАның XVI дөнья чемпионаты башланырга санаулы көннәр калды: 24 июльдә аңа рәсми төстә старт бирелә. 17 июльдән башлап төрле илләрнең җыелма командалары инде Казанга килеп урнаша бара, мисалга, Канада, АКШ, Германия, Франция, Австрия, Бразилия, Мексика һ.б. илләр спортчылары инде җирле климат һәм шартларга яраклаша тора. Хәзерге вакытта әлеге дөнья чемпионатына 190нан артык спорт федерациясе үзенең катнашачагын раслады – бу моңа кадәр булмаган күренеш, масштаб, әйтик, соңгы чемпионатны үткәргән Барселонада федерацияләр саны 72 иде. Килүчеләрнең төп «ташкыны» 21 июльдән көтелә: ул көнне 27 илкүләм федерация килергә тиеш, 23 июльдә - 34 федерация, 28 июльдә – 89 федерация, 29 һәм 30 июльдә – 50шәр.
Бүген Казан каласы җитәкчелегенең «эшлекле дүшәмбе» киңәшмәсендә чыгыш ясаган шәһәр Башкарма комитетының тышкы элемтәләр һәм туризм комитеты җитәкчесе Евгения Лодвигова шул хакта мәгълүмат бирде. Аның сүзләренчә, чемпионатта катнашучылар һәм кунаклар Спортчылар (Универсиада) авылында һәм Казанның 29 кунакханәсендә (отельләр, хостелларда) урнаштырыла, ә алар саны, ФИНА делегатларын да кертеп, 6,5 меңнән артык булачак. Казан кунакханәләре XVI дөнья чемпионатына катнашучыларны һәм туристларны кабул итәргә тулысынча әзер, дип ышандырып әйтә алам. Кунакханәләр әзерлеге шәһәр хакимиятенең даими контроленда булды, аерым алганда, мэр Илсур Метшин, кунакханә инфраструктурасын тикшерү максаты белән, берничә тикшерү үткәрде. Ник дигәндә, Универсиада – ул безнең өчен беренче этап булса, дөнья чемпионаты – катнашучылар, телетамашачылар, массакүләм мәгълүмат чаралары саны ягыннан күпкә киңрәк колачлы, җитдирәк, дип саный докладчы.
Чемпионат барышында кунакчыллык мохите булдыру йөзеннән, Спортчылар авылында, кунакханәләрдә вакытлыча кабул ителгән персонал тәүлек әйләнәсе эшләячәк. Кунакларга һәм чепионатта катнашучыларга ярдәмгә бүгеннән CALL-үзәк хезмәт күрсәтәчәк: килеп урнашу мәсьәләләрендә 8-800-2222-116 федераль номерына шалтырату кирәк була. Казан кунакларына уңайлы булсын өчен, аэропорттан килү, кунакханәдә яшәп тору, Татарстан башкаласы буйлап экскурсияләр ясау мөмкинлекләре бәян ителгән туристик пакетлар эшләнгән.
сылтама:
http://tat.tatar-inform.ru/news/2015/07/20/111422/
Комментарий юк