Логотип
Шигърият

Шәһәр чаганнары

Йолдызыбыз үзенең шигъри триптихына исемне дөрес куйган: әйе, шәһәр шагыйрәсе ул, шәһәрдә күргән дөнья, табигать… 

Шигъри чаганнар. Кызыклы, сурәтле күзаллау! Ике авыл баласы — олуг тәнкыйтьче 
һәм танылган шагыйрә тудырган Йолдыз — үзе дә шәһәр чаганы. Бездән аерылып торган, үзгә, әмма матур, эрудициясе, әдәби белеме сизелеп торган тансык иҗат. “Мәрхәбә!” — диик.

Рәдиф ГАТАШ. 

I

Синең тәрәзәләр 
күккә карый.
Иркә сабый булып
ярым үпкә белән
күккә.
Шыгыр-шыгыр
кыргый шәһәр чаганнарын,
шул чаганда көздән калган
 таган барын
син белмисең.
Таган тактасына 
гыйнвар кары
хәбәр ташый
синең хакта,
тәрәзәңә сеңгән 
бармак эзең
октавалар буйлап
каттан катка
ашыга-оча...

Оча бирсен әйдә.
Исем китми генә
тәрәзәләр саныйм
астан өскә.
Дүрткә кадәр...

II
Яланаяк кына 
             әллә кая
кайту:
Алтай?
     Кашан? 
           Сарай-Бату?
Чәрдәкләнгән асфальт аша.
әллә нәрсә эзләү:
йөз ел каза 
тезләр канаганчы...
һаман Казан, Казан —
унберенче гасыр 
әллә нидән качу:
җан үзәге — орчык
юкны эрләп борчый:
нәсел очы...
нәсел очы...
Гел чәй дә чәй,
хәтер — алма кагы:
— үткәннәрне оныт, балам,
киләчәкне сагын...
Туран җиле 
          кураларда
озын көйне
          өзә-өзә:
күңел-котып — 
           бер хронотоп
Ләүх-әл-Мәхфүздә.
үз дә...
       ләкин нидер җитми:
теле читме? 
           чиге тармы?
тамырыбыз
           типтәрме?
                    армы? 
әллә тагын... 
Без — 
асфальтка беркетелгән 
кыргый шәһәр чаганнары.

III
Бу таң минсез 
атмас төсле —
йөзле вольфрам яктысында
таң аттырам.
Ак торналар юлы сызам
пыскып янган йолдызлардан
язга таба.
Саба җиле,
илен танымыймы,
тайфун булып тәрәз кага:
— Кайтсын!
(Мең укылган сага — 
кайсын алма...)
җил бер кылда 
“Lieder” уйный,
һаман тынмый:
— Сагынырлык берни дә юк?
 Чынмы?
җирдә тыз-быз — 
               кызык эзли,
мең үзгәрә:
инде менә бөреләрдә 
               парә-парә — 
һәрбер сынга җил идарә,
ә аннары...
шау чәчәктә таң аттыра
шәһәр чаганнары.
Язның тыштан 
тып-тын чагы,
мыштым чагы сагынуның —гел бер көйгә.
Күрше өйдә генә
яна кемдер:
яланкүңел йөреп 
салкын тигән.

Следите за самым важным и интересным в Telegram-каналеТатмедиа

Комментарийлар

  • аватар Без имени

    0

    0

    Елап укыйм Сезнең бу шигырьне....Кат-кат итеп... Башка барып җитсен, җилкендерсен, җанга узсын.

    • аватар Без имени

      0

      0

      Эчтялекле шигырь.

      • аватар Без имени

        0

        0

        Шәһәр кешесе күп нәрсәдән мәхрүм

        Хәзер укыйлар