Сыналган йөрәк 8

Дәвам. Башы: http://syuyumbike.ru/news/otkrovenie/synalgan-iorak

                         http://syuyumbike.ru/news/otkrovenie/synalgan-iorak-2

                        https://syuyumbike.ru/news/otkrovenie/synalgan-iorak-3

                        http://syuyumbike.ru/news/otkrovenie/synalgan-iorak-4

                        https://syuyumbike.ru/news/otkrovenie/synalgan-iorak-5

                       http://syuyumbike.ru/news/otkrovenie/synalgan-iorak-6

                       https://syuyumbike.ru/news/otkrovenie/synalgan-iorak-7

Русланның тыныч кыяфәте, эмоция белән әйтелгән сүзләре кызның күңелендәге шикләрне эреп юкка чыгарды. Курку халәтен эчке горурлык хисе алыштырды. Иң авыр вакытта кадерле, якын кешесенә ярдәм кулы суза алуына чиксез шат иде ул. Башында туган начар уйлары өчен бераз оят та булды: «Ничек инде Руслан турында тискәре фикерләп, аны мошенниклар белән янәшә куярга була? Ярый әле кеше телепат түгел, баштагы туган уйларны укый, белә алмый. Әгәр сөйгәне аның шикләнүен сизсә – бик каты үпкәләр иде, ышанычы кимер, хәтта яратудан туктар иде…

Руслан әйткән сүзләр Эльмираны уйларыннан арындырып, чынбарлыкка кайтарды:
– Матурым, банк ябылырга бик аз вакыт калып бара, тизрәк такси чакырыйк та, вкладыңнан акчаңны алыйк.
– Әйе, әйе, мин дә шул фикердә, – дип җавап кайтарды кыз.

Элек бар нәрсәне дә төптән уйлап, әти-әнисе белән киңәшләшеп хәл иткән Эльмира мәхәббәт корбанына әйләнгәнен сизмәде: ул үзен егет каршында ихтыярсыз, йомшак, тыңлаучан песи баласы кебек хис итте. Кайчак, баш миенең бер почмагында шик корты уянып ала уянуын. Әллә соң чынбарлык урынына төш күреп ятамы? Матур, сихри төш. Берзаман уянып китәр, аңына килер – элеккеге көндәлек тормыш яңадан әйләнеп кайткан булыр. Юк, юк... Уянасы килми, үткән көннәренә, ялгызлыгына кире кайтасы килми кызның. Аллаһ кушса – киләчәк якты булыр, якты көннәрдән генә торыр.

Мәскәү кунагында әйтерсең, гипноз көче бар иде: карашы белән үзенә буйсындыра, сихерли белә ул. Шулай булмаса, кунакка кайткан егетне беренче төндә үк өенә алып кайтыр идеме акыллы кеше?

Руслан телефоннан адресны әйтеп такси чакырды. Икесенең дә ясап куйган чәйләре эчелмәгән килеш өстәлдә калды – өс-башларын алыштырдылар да, фатир ишеген бикләп, урамга ашыктылар.

Чакырылган машина 5 минуттан килеп җитте. Руслан Эльмирага берничә тапкыр бер үк сорауны бирде:

– Матурым, паспортыңны онытмадыңмы?
– Юк, бар документларым үзем белән, борчылма, – дип җавап кайтарды кыз.

Ниһаять такси банк бинасы янына килеп туктады. Руслан Эльмира белән эчкә үтәргә теләмәде, урамда көтәрмен, диде.
– Халык күп урында тыным кысыла, акчаны үзең генә алсаң хәерле булыр, – дип акланды ул. Үгет-нәсыйхәтләрен дә әйтергә онытмады:
– Банкта клиентларга тиеш булмаган, артык сораулар бирергә яраталар, син акча алуның чын сәбәбен әйтмә, аларга вкладларны ябу файдага түгел, мең төрле сәбәп табып, кире уйларга күндерәчәкләр. Кассир белән диалогка кермә. Мине тыңла. Мин сиңа ышанам!

Эльмира банк ишеген ачып кергәндә касса янында чират беткән иде. Ул ишек янында урнаштырылган аппарат экранында үзенә кирәкле хезмәтне эзләп табып кнопкага басты, бер секунд эчендә выжылдаган тавыш чыгарып, кәгазь талон килеп чыкты. Таблода кабинага чакыруны белдергән номер пәйда булды. Эльмира паспортын учына кысып, кассир янына кереп китте.

Клиентның шартнамә шартларын бозып, кертемдә тупланган барлык акчасын алырга ниятен белгәч, банк хезмәткәре уйчанланып калды, гаҗәпләнүдән җилкәсен сикертеп куйды.
– Сез ныклап уйладыгызмы? Ике атнадан договорда күрсәтелгән вакыт уза, сезгә яхшы гына процент күчәчәк. Әгәр бүген шартнамә шартларын өзәсез икән, бер тиен дә түләнмәячәк, каралган процентлар югалачак. Бәлки тагын бер тапкыр уйлап карарсыз? 11 ай түзгәнне ике атна гына көтәргә киңәш итәр идем…

Шул вакытта Эльмираның колагында Русланның сүзләре ишетелгәндәй булды: «Банк хезмәткәрләре сәбәп табып, кире уйларга күндерәчәкләр. Диалогка кермә. Мине тыңла!»
– Мин сезне аңлыйм. Ләкин миңа акча кирәк. Шуңа вкладымны ябарга мәҗбүрмен.
– Ихтыярыгыз... Бәхеткә, бүген кассада сезгә кирәкле күләмдә акча бар. Банк кагыйдәләре буенча вкладтан зур суммада акча алыр алдыннан клиент телефоннан заказ биреп куярга тиеш. Икенче юлы бу таләпне истә тотсагыз иде.

Кассир Эльмираның паспортын зур игътибар белән күз алдыннан үткәрде, аннары документның кайбер битләренең ксерокопиясен алды. Компьютердан касса ордерларын чыгарып, Эльмира каршына документлар тезеп куйды:
– Кайда галочкалар, кулыгызны куегыз.

Кәгазьләрне тиешле папкаларга урнаштыргач, банк хезмәткәре сейфтан 5 меңлекләр белән шыплап тутырган пачкаларны өстәлгә тезеп саный башлады:
 – Бер, ике, өч, дүрт... сигез, тугыз, ун…

Каршысында бер тау булып яткан акча күргәч, Эльмираның йөрәге кысылып куйды. Ике ел буе җыйган акчаларны шулай тиз генә вкладтан алырмын дип башына да китереп карамаган иде ул. 

(Дәвамы бар.)