Ул кешеләрне ярата иде...

Легендар журналист, публицист һәм язучы, республиканың Габдулла Тукай исемендәге Дәүләт премиясе лауреаты, чирек гасыр гомерен КПСС Үзәк Комитеты газетасы «Советская Россия»нең Татарстандагы үз хәбәрчесе булган Марсель Зарипов арабыздан киткәнгә дә ел булды...

Казанның «Ярдәм» мәчетендә аны искә алу мәҗлесе үткәрелде... Якыннары, туганнары, язучылар, журналистлар, умартачылар (ул умартачы да, балыкчы да, бакчачы да иде) – 40 лап кеше килгән иде анда. Һәркайсының күңелендә Марсель абый турында якты истәлекләр саклана.

Мин үзем өчен Марсель абый турында әллә никадәр яңалык ачып утырдым.

Нурихан Фәттахның «Итил суы ака торур» («Итель-река течет») романын да, Әмирхан Еникинең «Әйтелмәгән васыять»ен дә («Завещание»), Вакыйф Нуруллинның «Аккан су юлын табар» романын да («С ношей гору не обходят»), Гариф Ахуновның «Артышлы тау буенда» («За горой Артыш») әсәрен дә Марсель Зарипов рус теленә тәрҗемә иткән!

Вакыйф Нуруллин кызык истәлек сөйли. Бу хәлләр Мәскәүдә була. Берчак СССР Язучылары съездында нишләптер автономияле республика вәкилләренә, шул исәптән, Татарстан Язучылар берлеге рәисе Гариф Ахуновка да сүз бирмәгәннәр. Моның өчен борчылган Гариф абый Марсель Зариповка, үзәк газеталарга тиз генә Татарстанның казанышлары, әдәбият-сәнгать өлкәсендәге уңышлары турында язасы иде, дип куя. Инде шактый соң икән. Собкор Зарипов: «Тынычлап йокла, материал булыр!» – дип кенә әйтә. Тиз генә яза да, Вакыйф Нуруллинны да үзенә ияртеп, «Литературная Россия» газетасының стенографисткасы фатирына чыгып китә. Икенче көнне иртән газетада Гариф Ахунов исеме астында республикабыз тормышы турында саллы мәкалә дөнья күрә! Гариф Ахунов үз күзләренә үзе ышанмый!

Татарстан Язучылар берлегенең бүгенге рәисе Данил Салиховны Марсель Зарипов белән иҗат кына түгел, умартачылык та берләштергән икән! Ул кызыклы истәлекләре белән уртаклаша...

Умартачыларның – үз сүзләре... (Умартачылык, кортлар карау, балның мең төрле шифасы турында Марсель абый язган китап турында да әйтми калмыйлар.)

Озак еллар «Ватаным Татарстан» газетасы баш мөхәррире булып эшләгән Мөнир Әһлиуллин Татарстан Журналистлар берлеге уздыра торган «Бәллүр каләм» конкурсы турында әйтеп уза да: «Ел саен берәр ветеран журналистка җиңел автомобиль бүләк итә башлауларына Марсель абый гына «гаепле», – ди. – Рөстәм Миңнехановка заманында ул сиздерә инде шушы теләкне. «Журналистларга машина бүләк итә аласызмы, Рөстәм Нургалиевич? Югыйсә йә чәй сервизы, йә урын-җир комплекты белән генә бәялиләр безнең халыкның хезмәтен», – дип әйтеп ташлый. Президент берсүзсез риза була...»

Марсель Зариповның хатыны Саяра апа, улы Илдар, килене Гөлсинә әнә шундый истәлекләрне барлап, «Он в нашем сердце...» («Ул безнең йөрәктә...») дигән җыентык әзерләп чыгаралар. Анда журналистлар Римзил Вәлиев, Умар Богдалов, Александр Ожегов, София Гарифуллина, Илдар Закиров һәм башкаларның журналистика мэтры турындагы язмалары, хатынының, улының, оныкларының җылы хатирәләре урын алган. Узган ел Россия матбугаты көнендә мин дә Марсель абыйны искә алып бер хатирә язган идем, ул да кереп киткән җыентыкка...

«Аны беркем дә алыштыра алмый... Ул һаман янәшәдә сыман...» – дип язган улы Илдар.

«Ул миңа һәрчак «кызым» дип эндәште... Ул берәүгә дә үпкәләмәде, аның үзенә дә һич үпкәләп булмый иде... Ул кешеләрне ярата иде...» – дип искә ала килене Гөлсинә.

«Марсель, синең истәлеккә

Утырттык миләш агачын.

Онытылмыйсың, һаман истә

Кояш нурыдай карашың...»

Монысы – Саяра апаның шигырьгә салган сагынулары...

Әйе, онытылмый. Сагындыра, юксындыра...

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • Үги әнкәйнең җылы йөрәге «...Үги ананың бик әйбәтләре була. Гадәттә, алар турында гел яман сөйлиләр, ләкин алар турында юньле сүзне күбрәк сөйләргә кирәк. Чит канга ана булырга тырыша бит ул. Мәҗбүри яратып булмый бит. Ә ул рольгә кереп «уйнарга» тиеш. Бала исә рольгә керми, «уйнамый». Ике артистның берсе уйнап, икенчесе уйнамаса, спектакль туа алмый. Үги аналы гаиләдә әнә шуңа күрә җылы, уңай тормыш коруы бик кыен. Үги аналарны кызганырга, ихтирам итәргә кирәк...» Мөхәммәт Мәһдиев «Мәңгелек яз» әсәрендә үги әниләр турында әнә шундый уйлануларын язып калдырган. Үги тормышны үз башына төшкәннәр генә аңлыйдыр, мөгаен. Үги ананың да, үги баланың да үз хәле... Әмма гомер уртасына җиткән ир балачагын искә алганда «Үги әниләргә һәйкәл куярга кирәк», – ди икән, димәк, барлык үги әниләр дә, халык телендәге кебек, явыз түгелләр. Чит балаларны карап үстерә икән, димәк, алар олы йөрәкле... Үги әни белән үскән Татарстанның халык артисты Җәвит ШАКИРОВ үзе сөйләсен әле...
    8898
    10
    104
  • Бәхетле булырга хакым бар!  Мин кияүгә 25 яшемдә чыктым. Яратып чыктым...
    8982
    8
    72
  • Өч кенә көнгә... – Кирәкми. Кешечә түгел бу. Шалтыратмагыз. Өметләнеп көткәнче, алдан ук барысын да аңласын. Башка бер сүз дә әйтмичә, нянечка балалар янына кереп китте. Ишек тавышы йөрәкне сызып үткән кебек булды. Бар да тынып калды. 
    4694
    4
    55
  • Сөеп, сөелеп яшисем килә-2 «Таһирә өстеннән жалу язганнар» дигән хәбәр авылда таралганга да бер айга якын вакыт үтте. Тегеләй дә, болай да дип тикшергәннән соң: «Фактлар ачыкланмады», дигән.
    5940
    2
    26
Реклама
Соңгы комментарийлар
Реклама
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан