​Гомер бүләк итәм...

(Бала табу йортында бала белән бергә туган ертык фикерләр)


Бала тапканнан соң палатада ятам

Рухы белән көчле хатын-кызлар гына бездәге бала табу йортларында бала таба ала. Бу җөмләдә, кызганыч, басым «бездәге бала табу йортларында» дигән сүзтезмәгә төшә. Техник җиһазландыру-аппаратура югары дәрәҗәдә, табиблар үз эшләренең остасы, әмма хатын-кызны әйләндереп алган диварлар, коридор, ашханә, туалет-душ дигәннәре, чиста булса да, әйтерсең лә, югарыда әйтелгән рухны сындыру өчен махсус шундый ямьсез һәм иске. Кайбер әниләр сабыйларына гомер бүләк иткәннән соң да, палатада урын булмаганга, коридорда ятарга мәҗбүр хәтта. Киноларда күрсәтелә торган матур бүлмәләр – кайда алар?..

«Тулгак ешайгач, кабаланмыйча роддомга җыенасыз. Су китсә, ашыгарак төшәсез», – курсларда шулай өйрәттеләр. Миңа исә, яшем утыздан узганга күрә, тулгак башланганны бала тудыру йортында көтәргә тәкъдим иттеләр. Шулай эшләдем дә. Кемдер ул тулгак тотуны көтеп морадына ирешә, срогы 41 атнадан узучылар исә стимуляциягә дучар ителә – махсус дару, гель ярдәмендә тулгакны чакырталар. Аналык муентыгын табиб үзе дә ачарга мөмкин. Әмма бу да ярдәм итмәсә, бала ятучы куыкны тишеп, капельница билгели... Күрше өстәлдә яшь ана ята – җан ачысы белән кычкыруы әле дә хәтердә, мин дә шулай кычкырдым микән?..

Бала тапкач ук акушерканың кесә телефонымны китереп бирүенә шатланып бетә алмыйм – иремә дә шылтыраттым, сабыебызны фотога төшереп, аңа ММС та җибәрдем. Каталкага яткызып, бала тапканнар катына алып киттеләр. Әйберләрем тутырылган пакетлар да шул каталка өстенә өелде. Матур кинолардагы хастаханәләргә якын да килми безнең бала тудыру йортларындагы шартлар... Әмма тора-бара болар хәтердән юып төшерелә – «котылдым!» дигән эйфория генә кала.


Эйфориядән соң

Урыннан торып йөрергә куштылар. Бу минуттан инде үзеңне үзең карыйсың. Кан­га батканмын икән. Юыну әйбер­лә­ремне көч-хәл белән эләктереп, үземә генә ышанып, коридорның икенче очында урнашкан душка юнәлдем. Биредә оят дигән нәрсә юга­ла икән. Кешенең кешедә эше юк – тузган чәч, сыгылып төшкән билләргә игътибар итмисең – таплар калдыра-калдыра коридор буйлап атлыйсың...
Кызымны көненә җиде мәртәбә имезергә алып киләләр. Әле сөт тә юньләп төшмәгән – ни суырадыр балакаем? Ач кала – алып киткәндә елый. Аңлыйм – балалар бүлегендә туклыклы катнашмалар бирерләр. Ә ашатмасалар? Әни йөрәген җиңел генә тынычландырырмын димә.

Палатадагы барлык әниләр нарасыйларыннан башка берни күрмәскә әйләнә. Арабыздан беребез генә тик ята. Аның игезәк балаларының берсен, хәле авыр булганга, үзәк хастаханәгә алып киттеләр, икенчесе исә аннан да хәлсезрәк – биредә инкубаторда, урыныннан кузгату хәтәр. Без бала имезгәндә ниләр генә кичермидер инде ул... Ә түр караваттагысы – яшь кенә үзе – монысы икенче баласы икәнен, берен­чесе­нең башындагы шеш аркасында ике яшендә үлүен әйтеп салды. Баласы турында сөйлисе килә – сизәм, әмма сораулар бирергә бере­безнең дә йөрәге җитми. Күренеп тора – ул байтак күз яше түккән – табибларга әлеге диагнозга карата тыныч кына сораулар бирә ала – «Томографияне кайчан ясатырга мөмкин? Беренчебезнең шеше тумыштан дип әйттеләр соңыннан, югыйсә УЗИ берни дә күрсәтмәгән иде... Нәселдән килмидер бит бу?» Үземне чолгап алган язмышларны күңелгә якын алмаска тырышам. Булмый. Мине ике кешелек палатага күчерделәр – алты айлык булып туган игезәк балалары инкубаторда ятучы тагын берәү. Баламны имезергә алып килгәндә ул бичара ниләр уйлый икән? Үземнең кичергәннәремне әйтә алам – мин имезгәндә, ул сөт суыртучы аппарат белән күкрәккә төшкән сөтен сава иде. Аппаратның битараф тавышы кызымны матур сүзләр белән иркәләргә киртә була алмады. Палата тынлыгында аппарат шаулавын, яшь әнинең туганнары белән бертуктамый телефоннан сөйләшүен тыңлыйбыз. Ул хатынны үзе кебекләр янына урнаштырсалар, бер-берсе белән сөйләшеп, күңел яраларын бушатырлар иде. Әмма персоналның моны уйларга вакыты да, мөмкинлеге дә юк. Гаепләп әйтүем түгел, ул мөмкинлек юк – шуның белән шул.


Балам өчен өзгәләнүләр

Баламны имезергә алып килмәделәр. «Аны капельница астына салдылар», – яшь кенә нянечка күзләрен шарландырып миңа карый. Йөрәгем, әйтерсең, убылып төшеп китте! Балалар блогына барып җиттем җитүен, кемгә мөрәҗәгать итәргә? Көчкә педиатрны табып алдым. «Сары төшкән. Лампа астында яткыру ярдәм итмәде. Капельница куйдык». Нәрсә ул сары төшү? Сабый үзен ничек хис итә? Нәни генә кан тамырларын энә авырттырмыймы?! Яңа туган балаларда бу авыру еш очрый, ул баланың кан һәм тукымаларында билирубинның (гемоглобин таркалганда хасил була торган пигмент) җыелуыннан барлыкка килә икән. Канда билирубин артып китсә, ул мигә үтеп кереп, үзәк нерв системасының күзәнәкләренә зыян китерүе мөмкин. Кичем балалар бүлеге янында таптанып узды. Кечкенә балаларын югалтып, акылдан шашкан хатын-кызларның хәлен элек аңлап бетерми идем. Хәзер исә шуларны уйласам, тетрәнеп куям... Акылдан шашуларына ышанам. Хәтта йөрәк әрнүләрен үземә «үлчәп» карый алам. Аллам сакласын... 


Тагын киләсем килә!

Күңелем белән яңадан беренче көнгә әйләнеп кайтам. Бала тапканнан соң дүрт кенә сәгать узды. Авыртмаган җир калмады сыман. Хастаханәдә уздырган ул көнемне искә төшерәм. Барлык процедуралар, табибның авырттырып караулары, үтереп бил һәм арка сызлаулар, тулгак, ачысы, җөй салулар... 

Ә акушерка баламны күкрәккә салуга... ирексездән елмаеп җибәрәм. Бер табибка, бер акушеркага карыйм, янәсе, күрәсезме, нинди матур минем кызым?! Мондый бала күргәнегез булмагандыр әле?! Үзем өчен бөтенләй көтелмәгән ачыш ясадым – хастаханә шыксызлыгы да, кече персоналның (кайбер-ләренең) тупас булуы да рухны сындыра алмый икән. Ни дисәң дә, бу авырлыкларга түзәрлек икән...

P. S. Мин яткан бала табу йортында капиталь ремонтка әзерләнәләр. Икенче баламны матур йортта табачакмын!


ИГЪТИБАР
Бала тапканнан соң аналык каннан арына башлый, ул чистара, элекке хәленә кайта. Күремгә охшаган канлы сүл (лохияләр) килү ике-өч, хәтта алты атнага да сузылырга мөмкин. Алар кимергә һәм куәтләнергә мөмкин. Бу чорда бары тик прокладка гына кулланырга ярый – тампон бактерияләр кертәчәк! Имезгәндә бүлендекләр күбрәк килергә мөмкин. 

Лохияләр тизрәк чыксын өчен бала табу өстәлендә үк гади күнегүләр ясагыз – бишкә кадәр санап, тирән сулыш алыгыз һәм шулай ук бишкә кадәр санап сулышны чыгарып, эчегезне киерегез. Палатага күчеп, табиб сезне караганнан соң, аның белән киңәшеп, әлеге күнегүләрне көненә унар мәртәбә ясагыз.
Аналыкның торышы, соңгылыкның чыгып бетү-бетмәве УЗИда карала. Әмма кайбер очракта УЗИда чиста күренгән аналыкны берничә атнадан чистартырга туры килмәгәе! Уяу булыгыз! 

Шуңа күрә:
– прокладканы сәгать саен алыштырсагыз,
– бер атна узгач та бүлендекләр ачык кызыл төстә булса,
– яткан килеш тә күп килсә,
– кан кисәк-кисәк булып оешып чыкса,
– начар ис килсә, 
– температура күтәрелеп, калтыратса, кичекмәстән табибка мөрәҗәгать итегез!

фото: pixabay.com

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • «Мин синең иреңне бәхетле итәм...» Тормышның яңа борылышында үзебезне нәрсә көткәнен без беркайчан белмибез. Уйламаган җирдән аякка уралган ниндидер борчулармы, әллә бөтенләй көтмәгән сөенечләрме? Тормыш борылышлары безне күкләрдән җиргә төшерә ала. Ә кайчак – киресенчә: бәхетсезлегең бәхет юлына бер адым гына булуын аңлата. Чүпрәле районының «Туган як» газетасы баш мөхәррире Резидә Җамалтдинова һәм аның ире Рамилнең очрашу, танышу, кавышу тарихы – шуңа бер мисал. Ачыктан-ачык сөйләшәбез.
    6947
    7
    65
  • «Хатының кайда – син шунда бул, тормышны бергә тартыгыз» «Тәгәри китте йомгагым, күрмәдегезме, агайлар», – ди Гөлчәчәк татар халык әкиятендә. Гомер йомгагын сүтә-сүтә, көннәр, айлар, еллар үтә... Адәм баласы әллә кайда – офыклар артында көтеп торган бәхетне эзләп бара да бара... Үткәнебезне – бар иткән, киләчәгебезгә нигез салган бүгенгебезне сизми дә калабыз. Мин бүгенгем белән бәхетле!
    4358
    0
    43
  • Өмет белән алга карап яшәргә әнкәйдән өйрәндем 1981 ел. Булачак кайнанам белән мин Казан тимер юл вокзалында таныштым. Төнге сәгать 11 дә! «Төнлә белән беренче тапкыр кайнанаң белән кайнатаңны күрергә вокзалга төшәчәксең», – дисәләр, һич ышанмас идем.
    2849
    4
    36
  • Үтмә, гомер, заяга! Хатынын һәр баганага көнләвенең урынсыз гына түгел, ә тормышларын җимерүче, бер-берсеннән читләтүче гамәл икәнлеген, кызганыч, Гамил һич кенә дә аңларга теләми...
    9430
    6
    35
  • Сыналган мәхәббәт бәхете Язмыштан котылып булмый, язмышыңа язылган булса, тешеңне сындырып керер, диләр. Вәсиләгә Газие белән бәхетле булырга язган булган инде. Урау юллар, яңа гаилә аша узып булса да. 
    3688
    0
    30
Реклама
Соңгы комментарийлар
  • 1 декабрь 2022 - 21:27
    Без имени
    Баланын этисе бардыр бит? Этисе дэ алгаласын бакчадан, уйнатсын, саф хавалар суларга алып чыксын. Ник эни тиеш дип белэсез? Ул узенекен устереп, кеше иткэн инде, житэр ана. Олы яшьтэ, башны кутэрмичэ, бала карап булмый да эле, арыта да. Узегез тапкансыз, узегез устерегез! Алла сабырлык хэм ярдэмен бирсен. Бала устеру жинел дигэн кеше юк эле, аны бит уйнатып, ашату, юындыру гына тугел, тэрбия бирергэ дэ кирэк.
    Әни шәхси тормышын төзи, мин җәфаланам
  • 1 декабрь 2022 - 21:15
    Без имени
    Белмим, мин дэ баланы берузем тарбиялим, эни эти икенче шэхэрдэ торалар, Бер булышучым да юк, куршедэн башка, элдэ Аллага шокер ул бар, баланы иртэн торып мэктэпкэ озата (1класс), мин эшкэ БИК иртэ китэм, дэрес беткэч подъездда каршы алып квартирага кертеп, ашарга жылытып бирэ. Свидание га йорергэ уемда да юк, даже не представляю как это. Куршемэ озын гомер сэлэмэтлек телим, элдэ ул бар. Бала усэ ул, Гомер буе бэлэкэй булмый, Шуна элеге вакытта баланы карау минем очен важнее всяких свиданий и личной жизни.
    Әни шәхси тормышын төзи, мин җәфаланам
  • 1 декабрь 2022 - 16:39
    Без имени
    Баштан утте, килмэгэн туганы калды микэн, торыргада. Йэ эйтмичэ килеп керэлэр иде. Аннары зарланганнарын ишеттемдэ. Берегезнедэ чакырып китермэдем, уземнен сезгэ барып торганым юк дидем. Мэжбури тотмыйм узегез килэсез дидем. Тоже бер булмэле иде. Хэзер килэсэлэрдэ китэлэр. Эле аларча булырга тиеш. Булмый гына торсын эле.
    Иремнең туганнары...
  • 1 декабрь 2022 - 10:43
    Без имени
    Котлыйбыз! Яшьлэр безнен килэчэгебез
    «Яңа йолдыз»да яңа җиңүче!
  • 1 декабрь 2022 - 09:35
    Без имени
    Бик кызыклы ,эчтелекле язма.
    Тау артында таулар бар
Реклама
«Татар мамык шәле» бренды нәрсә ул?
«Татар гаиләсе / үрнәк алыгыз»
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда