Һәр санны күңел биреп, укучыларыбыз кызыксынып укысын дип тырышып эшлибез. Тукайны бүләк иткән апрель аенда дөнья күргән яңа саныбыздагы язмалар да күңелегезгә хуш килер, дип ышанабыз.
Тышлыкта – татар дөньясына хезмәт итәргә туган татар кызы Гөлназ Гафурова. Казан шәһәр филармониясе солисты, остаз булудан тыш, шәхси иҗатын да бик матур үстерә ул.
Яшь ир! Ни өчен ире яшьрәк парлар саны арта? Гаилә стереотипларына бәйле сорауларга җавапны «Актуаль тема» сәхифәсендә эзлибез.
Ундүртенче каһарман әнисендә кунакта. Россия Герое Рамил Ибәтуллинга батырлык сыйфаты кемнән күчкән? Бу язмабыз шул хакта.
«Илаһи ният кылдым...» Шушы сүзләрне әйтергә соңармасак иде. «Мин намазга ничек бастым» сәхифәсенә килгән хатлар укучыларыбыз күңеленә кагылыр, дип ышанабыз.
Балачактан сәхнәгә гашыйк Миннур Шәмсетдиновның мәдәният йортын җитәкли башлаганына 20 ел! «Яшәү яме» сәхифәсендә Питрәч районы Чыты авылында гөрләп торган мәдәни тормыш белән таныша аласыз.
Бөтен татар дөньясы сокланырлык гаилә! Бер ананың биш улы! Пермь крае Барда районында Гыймадетдиновларда кунакта без.
Шигъри апрельдә яз өермәсе табигатьне генә түгел, күңелләрне дә җилкендергәндә, шагыйрәләр нинди хатлар язган? Бергәләп укыйк.
«Мин язмышны җиңдем», дип горурланып әйтә ала Лилия. Зур сынаулар алдында сыгылмыйча, бүгенге бәхетле көненә килеп җиткән ул.
Эльмира Закированың ничек итеп Мәскәүне «төяп кайтуы» турындагы язмасын «Үз дөньям» сәхифәсеннән укый аласыз.
Тукай иҗатын сәйләннәрдән тезгән язмабыз герое Мөсәмирә апа Сәлиеваның кул эшләренә сокланмый мөмкин түгел. Аның кул эшләреннән зур күргәзмә залы ачарлык!
«Аш-су» сәхифәсендә тәмле кабымлык – җимешле тавык рулеты әзерлибез.
